Malida 31-mart kuni 80 dan ortiq siyosiy partiyalar va fuqarolik guruhlari alohida bayonotlar eʼlon qilib, mamlakatda prezidentlik saylovi o‘tkazishni tezlashtirish haqida talablar bilan chiqdi. Bu haqda Anadolu nashri xabar berdi.
Xabarda aytilishicha, hukumatga qarshi norozilik bilan chiqqanlar harbiy xuntani prezidentlik saylovlarini imkon qadar tezroq o‘tkazishga va o‘tish davri harbiy boshqaruvini tugatishga chaqirgan.
“Hozirda mamlakat juda katta qiyinchiliklarni boshidan kechirmoqda. Hukumat o‘tish davrining barcha muammolarini hal qila olmaydi. Bu holatga chek qo‘yish vaqti keldi. Saylov o‘tkazilishi 26-martdan beri kechiktirilib kelmoqda. Bu mumkin emas”, — deya bayonot bergan 50 ga yaqin mahalliy tashkilotlarni birlashtirgan Malidagi Inson huquqlari himoyachilari tarmog‘i.
Polkovnik Assimi Goita boshchiligidagi o‘tish davri hukumati rahbarlari 2024-yil 26-martda fuqarolik boshqaruvini tiklash haqida xalqqa vaʼda bergan edi. Rasmiylar fevral oyida prezidentlik saylovlarini o‘tkazishni rejalashtirgan edi, biroq yakunda bu hodisa “texnik sabablarga ko‘ra” nomaʼlum sanaga qoldirilgan.
Mamlakatni hozirda harbiy xunta boshqarmoqda.
Izoh (0)