O‘zbekistonlik talabalarga Xitoyning Shinjon-Uyg‘ur avtonom tumanidagi universitetlarda tahsil olishlari uchun stipendiyalar taqdim etiladi. Bu haqda Oliy ta’lim, fan va innovatsiyalar vazirligi matbuot xizmati xabar berdi.
Ma’lum qilinishicha, vazirlik rahbari Qo‘ng‘irotboy Sharipov va Xitoyning Shinjon-Uyg‘ur avtonom viloyati hukumat raisi Erkin Tuniyaz O‘zbekiston fuqarolariga Xitoy oliy taʼlim muassasalarida o‘qish uchun stipendiyalar taqdim etish to‘g‘risidagi kelishuvni imzoladi.
Tomonlar oliy taʼlim muassasalari va ilmiy muassasalar o‘rtasida to‘g‘ridan to‘g‘ri hamkorlik aloqalarini o‘rnatish, taʼlim, ilmiy tadqiqotlar, texnologiya va menejment sohasida tajriba almashishni qo‘llab-quvvatlash, o‘zaro tashriflar hamda o‘qituvchilar va ilmiy xodimlar almashinuvini amalga oshirishga kelishdi. Shuningdek, qo‘shma tadqiqot guruhlarini yaratish, hamkorlikda ilmiy tadqiqotlarni olib borishga ham kelishildi.
Shartnomaga ko‘ra, Xitoy tomoni har yili noyabr oyining oxirigacha O‘zbekiston fuqarolari Xitoyda tahsil olishi mumkin bo‘lgan oliy o‘quv yurtlari ro‘yxatini, shuningdek, stipendiya dasturlari shartlari va talablari to‘g‘risidagi maʼlumotlarni taqdim etadi. Oliy taʼlim, fan va innovatsiyalar vazirligi esa Shinjon-Uyg‘ur avtonom tumanidagi universitetlarda o‘qish uchun tavsiya etilgan talabalar ro‘yxatini taqdim etadi.
Chet el fuqarolari orasidan stipendiya egalari uchun o‘qish muddati milliy taʼlim tizimi talablariga muvofiq qabul qiluvchi tomonidan belgilanadi. Xitoyda o‘qish uchun nomzodlar maʼlum darajadagi xitoy tilini bilishi talab etiladi. Zarur hollarda stipendiyaga tavsiya etilgan talabalar uchun til kurslari tashkil qilish mumkinligi ham inobatga olingan.
Birlamchi kelishuvga ko‘ra, stipendiyalar o‘qish, to‘lovlar va turar joy, sug‘urta mukofotlari (shu jumladan, tibbiy sug‘urta) hamda yashash xarajatlarining bir qismini qoplashi nazarda tutilmoqda.
Izoh (0)