O‘zbekiston va Rossiya o‘rtasida oliy taʼlim, fan va innovatsiyalar sohasida hamkorlik aloqalari mustahkamlanmoqda, deb xabar bermoqda Oliy ta’lim, fan va innovatsiyalar vazirligi matbuot xizmati.
Ma’lum qilinishicha, 19-mart kuni vazir Qo‘ng‘irotboy Sharipov Rossiyaning O‘zbekistondagi elchisi Oleg Malginov bilan uchrashdi. Uchrashuvda o‘zaro munosabatlarda to‘plangan ijobiy tajribaga asoslanib, Rossiya universitetlari bilan hamkorlikni yanada kengaytirish masalasi muhokama qilindi.
Xususan, O‘zbekiston–Rossiya taʼlim forumi haqida gapirilarkan, bunday anjumanlar sohadagi hamkorlikni rivojlantirish masalalarini muhokama qilish uchun muhim maydon bo‘lib xizmat qilayotgani qayd etildi.
Shuningdek, tomonlar yuqori texnologik sohalarda ikki tomonlama ilmiy-texnik hamkorlikka urg‘u berdi, jumladan, Rossiyaning eng yirik ilmiy markazlaridan biri “Kurchatov instituti” milliy ilmiy markazi bilan loyihalarni kengaytirish masalalarini muhokama qildi.
Qo‘shma ilmiy loyihalar tanlovini tashkil qilish hamda bu maqsadda yangi hamkorlik hujjatini imzolash yuzasidan fikr almashildi.
Izoh (0)