Ijodi emas, ko‘proq shaxsiy hayotidagi ziddiyatlar bilan omma eʼtiboriga tushgan xonanda Ruxshona 21-mart kuni 30 yoshni qarshiladi. Xo‘sh, nega u sanʼatni tanlagan va qaroridan afsuslanganmi? Keling, bu kabi savollarga quyida javob izlaymiz.
Navro‘z bayrami kuni tug‘ilgan xonanda oilada yolg‘iz farzand. Ota-onasi bolaligida ajrashib ketishgan va onasi uni yolg‘iz tarbiyalagan.
— Onam bilan hamisha sirdosh, do‘st bo‘lganman. Ona ham qiziga suyanib qolarkan, qiz ham shu qatorda onasini eng yaxshi sirdosh deb bilarkan. Onam hamisha qo‘llab-quvvatlaydi, buning uchun unga rahmat aytaman. Otam asli samarqandlik bo‘lib, harbiy sohada ishlagan. Onam esa ota tomondan namanganlik, buvim esa piskentlik bo‘lgan. Xullas, “Asli qayerliksiz?” deyishsa, o‘ylanib qolaman. Sanʼatga qiziqishimga, shubhasiz, onam sababchi bo‘lgan. Bolalikdan to‘garaklarga olib borib, kichik qobiliyatimni rivojlantirgan. Ammo mustaqil ijod boshlashimga onamning moddiy imkoniyati bo‘lmagan. “Akfa” prodyuserlik kompaniyasida o‘tkaziladigan kasting haqida eshitib, unda ishtirok etganman. O‘shanda bor-yo‘g‘i 15 yoshda edim. G‘olib bo‘lib, ularning ko‘magida ijodni boshlaganman, — deydi xonanda Ruxshona.
2010-yili ijodini boshlagan Ruxshonaning “ko‘tarilishi” u qadar qiyin kechmaydi. Chunki “Yuragim” nomli ilk qo‘shig‘i muvaffaqiyatli chiqadi va u ham hamma prodyuserlik kompaniyasining yulduzlari singari filmlarning yuziga aylanadi.
— U paytlari xonandalarning filmlarda suratga tushishi urfga aylangandi. “Shomurod va Durdona”, “Enagalar”, “Zamonaviy sovchilar” kabi filmlarda suratga tushganman. Ozmi-ko‘pmi, bu filmlar ham o‘z muxlislarini topgan, — deydi xonanda Ruxshona.
2010—2011-yillar xonanda uchun omadli kelgan. U xorijlik mashhur xonanda Avraam Russo bilan duet kuylagan va klip suratga oldirgan. Ammo xonanda haligacha bu qo‘shiqdan uyalishi va shu bois uni rasmiy sahifalarga joylamagani haqida aytib o‘tadi.
— Yoshlikda ertani o‘ylamay ish qilinarkan. Ertaga oila qursam, farzandli bo‘lsam, ularga nima deb tushuntiraman, deb o‘ylamas ekansiz. Ammo keyinchalik bu ishdan uyalarkansiz. Hozir bu qo‘shiqdan uyalaman, shu boisdan ham uni rasmiy sahifalarimga joylamaganman. Uni eshitmay qo‘yganimga ham ancha vaqt bo‘lgan. Keyinchalik baribir farzandlaringizdan uyalarkansiz, — deydi xonanda Ruxshona.
Ruxshona tengdoshlariga nisbatan ancha erta oila qurgan. U turmushga chiqqanida 20 yoshda edi, shunday bo‘lsa-da, ijodda o‘z o‘rnini topgan va qo‘shiqlari yoshlar orasida ancha ommalashgandi. Hozir u sobiq turmush o‘rtog‘i Sanjar Matkarimov haqida gapirishni istamaydi, ammo o‘sha paytlari u nega u insonga turmushga chiqqani haqida to‘lib-toshib gapirgandi.
— Biz avvaldan tanish bo‘lganmiz, chunki u kishining yaxshi kliplar suratga olishini bilardim. Ishlarini kuzatib borardim. Ammo ancha vaqtgacha bu haqda sir saqlaganmiz. Shu bois restoran yoki ko‘ngilochar joylarda uchrashmasdik. Qizlik uyimning yonida ko‘prik bo‘lardi, ilk uchrashuvimiz ham, to‘y taklifi ham shu yerda bo‘lgan. Onam avvaliga biroz xavotir olgan, ammo Sanjar aka bilan gaplashgach, to‘yimizga rozi bo‘lgan, — deydi xonanda Ruxshona.
Juftlikning to‘ng‘ich farzandi Habiba 2015-yilda, o‘g‘li Shukurbek esa 2016-yilda tug‘ilgan. Ularning nikohi ikkisi uchun ham omadli kelgan. Boisi xonanda turmush o‘rtog‘i bilan “Yurakkinam”, “Yana”, “Imkon bo‘lsa” va “Yur” kabi qo‘shiqlariga klip suratga olgan. Ruxshona boshlovchiligida rejissorning “Bola tilidan” nomli ko‘rsatuvi telekanallar orasida bir necha bor eng reytingi baland ko‘rsatuv sifatida eʼtirof etilgan. Sanjar Matkarimov Ruxshonaning “Yurakkinam” klipida rol ijro etib, aktyorlik mahoratini namoyish etgandi. Afsuski, bu er-xotin ijodkorlarning so‘nggi ijodiy ishi bo‘ldi.
Xonanda Ruxshona 2021-yilning oktyabr oyida turmush o‘rtog‘i, rejissor Sanjar Matkarimov bilan ajrashganini maʼlum qildi. Shundan so‘ng u Sanjar Matkarimov rejissyorligidagi “Bola tilidan” ko‘rsatuvi boshlovchiligidan ham ketdi. Ko‘p o‘tmay ko‘rsatuvni aktrisa Aziza Yoqubova olib bora boshladi. Bu orada Azizaning Ruxshona va Sanjar Matkarimov ajrashishiga sababchi ekani haqidagi mish-mishlar tarqaldi. Blogerlardan biri aslida Azizaga tegishli bo‘lmagan audioni tarqatib, Aziza Yoqubova Ruxshonaning oilasini buzgani haqida xabar tarqatdi. Aziza Yoqubova ushbu gap-so‘zlarga nuqta qo‘yish maqsadida blogerni izlab topdi va uni omma oldida kechirim so‘rashga majbur qildi.
Ruxshona ishtirokidagi ko‘rsatuv ko‘pchilikka manzur bo‘lgani uchunmi, tomoshabinlar undan keyingi boshlovchilarni u qadar yaxshi qabul qilishmadi. Shu bois boshlovchilar ketma-ket o‘zgardi yoki boshqa sabablar tufayli ular ishlashni istashmadi.
Xonanda Nigora “Mirsodiqova bilan” YouTube-kanaliga bergan intervyusida klipmeyker Sanjar Matkarimov va xonanda Ruxshonaning darz ketgan oilasi haqida ham gapirib o‘tdi.
— Eri judayam rashkchi, Ruxshona ham chiroyli ayol. Ko‘rishishga u-bu joyga yubormasdilar. Qoyil qolaman shu qizga, oilasidagi biror narsani hech qachon tashqariga bildirmagan. Endi mana, yig‘ilib kelganlari chiqib kelayotgandir. Lekin shu paytgacha erim bunaqa edi, qaynonam unaqa edi, degan gap bo‘lmagan. Erim rashk qiladilar, bora olmayman, tushunasizlar, deb aytardi. Hattoki bolalarimizning tug‘ilgan kunlarida ham farzandlaringni olib kel, tanishsin bir-biri bilan, der edik, nimaga olib kelmaysan, deb jahlimiz ham chiqar edi. Keyin yana o‘zimizga nima ham derdik, er xo‘p desa xo‘p, yo‘q desa yo‘q, deymiz. Biz hech narsa qila olmaymiz, jim turamiz. Ko‘p joyga yubormas edi, shuni bilaman, — deydi xonanda.
Afsuski, katta orzu-umidlar bilan qurilgan oilaga darz ketdi. Ajrimdan avval Sanjar Matkarimov turmush o‘rtog‘iga yetkazgan yengil tan jarohati, ijtimoiy tarmoqlar orqali shaʼnini toptagani va haqorat qilgani uchun 2 yil-u bir oyga ozodlikni cheklash jazosi taʼyinlandi. Undan keyin ajrim va bolalar otasini ko‘rishni istamasligi bilan bog‘liq videolar ham ko‘plab shov-shuvlarga sabab bo‘ldi.
Xonanda ayni kunda onasi va ikki farzandi bilan birga yashaydi. U asli millati o‘zbek, ammo Turkiyada yashaydigan inson bilan oila qurgani, to‘y qilishni esa o‘zi xohlamaganini maʼlum qildi.
— To‘y qilmaylik, ikkinchi bor oq ko‘ylak kiyishni istamayman, dedim. Keyin endi oilam haqida maʼlumot bermaslikka qaror qildim. Avvalgisi ommaga oshkor bo‘lgani uchun ham hammasi ovoza bo‘lib ketdi yoki ko‘z tegdi. Xullas, bu gal hammasini sir saqlayman, muxlislar oilamga emas, ijodimga qiziqishsin, — deydi xonanda Ruxshona.
Izoh (0)