Ижоди эмас, кўпроқ шахсий ҳаётидаги зиддиятлар билан омма эътиборига тушган хонанда Рухшона 21 март куни 30 ёшни қаршилади. Хўш, нега у санъатни танлаган ва қароридан афсусланганми? Келинг, бу каби саволларга қуйида жавоб излаймиз.
Наврўз байрами куни туғилган хонанда оилада ёлғиз фарзанд. Ота-онаси болалигида ажрашиб кетишган ва онаси уни ёлғиз тарбиялаган.
— Онам билан ҳамиша сирдош, дўст бўлганман. Она ҳам қизига суяниб қоларкан, қиз ҳам шу қаторда онасини энг яхши сирдош деб биларкан. Онам ҳамиша қўллаб-қувватлайди, бунинг учун унга раҳмат айтаман. Отам асли самарқандлик бўлиб, ҳарбий соҳада ишлаган. Онам эса ота томондан наманганлик, бувим эса пискентлик бўлган. Хуллас, “Асли қаерликсиз?” дейишса, ўйланиб қоламан. Санъатга қизиқишимга, шубҳасиз, онам сабабчи бўлган. Болаликдан тўгаракларга олиб бориб, кичик қобилиятимни ривожлантирган. Аммо мустақил ижод бошлашимга онамнинг моддий имконияти бўлмаган. “Akfa” продюсерлик компаниясида ўтказиладиган кастинг ҳақида эшитиб, унда иштирок этганман. Ўшанда бор-йўғи 15 ёшда эдим. Ғолиб бўлиб, уларнинг кўмагида ижодни бошлаганман, — дейди хонанда Рухшона.
2010 йили ижодини бошлаган Рухшонанинг “кўтарилиши” у қадар қийин кечмайди. Чунки “Юрагим” номли илк қўшиғи муваффақиятли чиқади ва у ҳам ҳамма продюсерлик компаниясининг юлдузлари сингари фильмларнинг юзига айланади.
— У пайтлари хонандаларнинг фильмларда суратга тушиши урфга айланганди. “Шомурод ва Дурдона”, “Энагалар”, “Замонавий совчилар” каби фильмларда суратга тушганман. Озми-кўпми, бу фильмлар ҳам ўз мухлисларини топган, — дейди хонанда Рухшона.
2010—2011 йиллар хонанда учун омадли келган. У хорижлик машҳур хонанда Авраам Руссо билан дуэт куйлаган ва клип суратга олдирган. Аммо хонанда ҳалигача бу қўшиқдан уялиши ва шу боис уни расмий саҳифаларга жойламагани ҳақида айтиб ўтади.
— Ёшликда эртани ўйламай иш қилинаркан. Эртага оила қурсам, фарзандли бўлсам, уларга нима деб тушунтираман, деб ўйламас экансиз. Аммо кейинчалик бу ишдан уяларкансиз. Ҳозир бу қўшиқдан уяламан, шу боисдан ҳам уни расмий саҳифаларимга жойламаганман. Уни эшитмай қўйганимга ҳам анча вақт бўлган. Кейинчалик барибир фарзандларингиздан уяларкансиз, — дейди хонанда Рухшона.
Рухшона тенгдошларига нисбатан анча эрта оила қурган. У турмушга чиққанида 20 ёшда эди, шундай бўлса-да, ижодда ўз ўрнини топган ва қўшиқлари ёшлар орасида анча оммалашганди. Ҳозир у собиқ турмуш ўртоғи Санжар Маткаримов ҳақида гапиришни истамайди, аммо ўша пайтлари у нега у инсонга турмушга чиққани ҳақида тўлиб-тошиб гапирганди.
— Биз аввалдан таниш бўлганмиз, чунки у кишининг яхши клиплар суратга олишини билардим. Ишларини кузатиб борардим. Аммо анча вақтгача бу ҳақда сир сақлаганмиз. Шу боис ресторан ёки кўнгилочар жойларда учрашмасдик. Қизлик уйимнинг ёнида кўприк бўларди, илк учрашувимиз ҳам, тўй таклифи ҳам шу ерда бўлган. Онам аввалига бир оз хавотир олган, аммо Санжар ака билан гаплашгач, тўйимизга рози бўлган, — дейди хонанда Рухшона.
Жуфтликнинг тўнғич фарзанди Ҳабиба 2015 йилда, ўғли Шукурбек эса 2016 йилда туғилган. Уларнинг никоҳи иккиси учун ҳам омадли келган. Боиси хонанда турмуш ўртоғи билан “Юраккинам”, “Яна”, “Имкон бўлса” ва “Юр” каби қўшиқларига клип суратга олган. Рухшона бошловчилигида режиссёрнинг “Бола тилидан” номли кўрсатуви телеканаллар орасида бир неча бор энг рейтинги баланд кўрсатув сифатида эътироф этилган. Санжар Маткаримов Рухшонанинг “Юраккинам” клипида рол ижро этиб, актёрлик маҳоратини намойиш этганди. Афсуски, бу эр-хотин ижодкорларнинг сўнгги ижодий иши бўлди.
Хонанда Рухшона 2021 йилнинг октябрь ойида турмуш ўртоғи, режиссёр Санжар Маткаримов билан ажрашганини маълум қилди. Шундан сўнг у Санжар Маткаримов режиссёрлигидаги “Бола тилидан” кўрсатуви бошловчилигидан ҳам кетди. Кўп ўтмай кўрсатувни актриса Азиза Ёқубова олиб бора бошлади. Бу орада Азизанинг Рухшона ва Санжар Маткаримов ажрашишига сабабчи экани ҳақидаги миш-мишлар тарқалди. Блогерлардан бири аслида Азизага тегишли бўлмаган аудиони тарқатиб, Азиза Ёқубова Рухшонанинг оиласини бузгани ҳақида хабар тарқатди. Азиза Ёқубова ушбу гап-сўзларга нуқта қўйиш мақсадида блогерни излаб топди ва уни омма олдида кечирим сўрашга мажбур қилди.
Рухшона иштирокидаги кўрсатув кўпчиликка манзур бўлгани учунми, томошабинлар ундан кейинги бошловчиларни у қадар яхши қабул қилишмади. Шу боис бошловчилар кетма-кет ўзгарди ёки бошқа сабаблар туфайли улар ишлашни исташмади.
Хонанда Нигора “Мирсодиқова билан” YouTube-каналига берган интервьюсида клипмейкер Санжар Маткаримов ва хонанда Рухшонанинг дарз кетган оиласи ҳақида ҳам гапириб ўтди.
— Эри жудаям рашкчи, Рухшона ҳам чиройли аёл. Кўришишга у-бу жойга юбормасдилар. Қойил қоламан шу қизга, оиласидаги бирор нарсани ҳеч қачон ташқарига билдирмаган. Энди мана, йиғилиб келганлари чиқиб келаётгандир. Лекин шу пайтгача эрим бунақа эди, қайнонам унақа эди, деган гап бўлмаган. Эрим рашк қиладилар, бора олмайман, тушунасизлар, деб айтарди. Ҳаттоки болаларимизнинг туғилган кунларида ҳам фарзандларингни олиб кел, танишсин бир-бири билан, дер эдик, нимага олиб келмайсан, деб жаҳлимиз ҳам чиқар эди. Кейин яна ўзимизга нима ҳам дердик, эр хўп деса хўп, йўқ деса йўқ, деймиз. Биз ҳеч нарса қила олмаймиз, жим турамиз. Кўп жойга юбормас эди, шуни биламан, — дейди хонанда.
Афсуски, катта орзу-умидлар билан қурилган оилага дарз кетди. Ажримдан аввал Санжар Маткаримов турмуш ўртоғига етказган енгил тан жароҳати, ижтимоий тармоқлар орқали шаънини топтагани ва ҳақорат қилгани учун 2 йил-у бир ойга озодликни чеклаш жазоси таъйинланди. Ундан кейин ажрим ва болалар отасини кўришни истамаслиги билан боғлиқ видеолар ҳам кўплаб шов-шувларга сабаб бўлди.
Хонанда айни кунда онаси ва икки фарзанди билан бирга яшайди. У асли миллати ўзбек, аммо Туркияда яшайдиган инсон билан оила қургани, тўй қилишни эса ўзи хоҳламаганини маълум қилди.
— Тўй қилмайлик, иккинчи бор оқ кўйлак кийишни истамайман, дедим. Кейин энди оилам ҳақида маълумот бермасликка қарор қилдим. Аввалгиси оммага ошкор бўлгани учун ҳам ҳаммаси овоза бўлиб кетди ёки кўз тегди. Хуллас, бу гал ҳаммасини сир сақлайман, мухлислар оиламга эмас, ижодимга қизиқишсин, — дейди хонанда Рухшона.
Изоҳ (0)