Ijtimoiy tarmoqlarda akkaunt sotaman, deya fuqarolarning pullarini o‘zlashtirgan 20 yoshli yigit qo‘lga olindi. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, Toshkent shahri Uchtepa tumanida yashovchi 21 yoshli S.I. ichki ishlar organlariga murojaat qilib, bank kartasidan 850 ming so‘m miqdoridagi pul mablag‘lari nomaʼlum shaxs tomonidan firibgarlik yo‘li bilan o‘zlashtirilganligini maʼlum qilgan.
Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Toshkent viloyati Angren shahrida yashovchi 20 yoshli K.S. sodir etganligi aniqlandi.
Gumonlanuvchi sifatida tergov harakatlariga jalb etilgan K.S jabrlanuvchi S.I. bilan Telegram orqali tanishib, “Mobile Legends Bang” akkauntini sotishi haqida aytib aldagan. Shundan so‘ng o‘zining foydalanuvida bo‘lgan bank kartasiga 850 ming so‘m pulni o‘tkazib olgan va yozishmalarni o‘chirib yuborib, pullarini o‘z ehtiyojlariga sarflab yuborgan.
Mazkur holat yuzasidan JKning 168-moddasi 3-qismi “g” bandi (firibgarlik axborot tizimidan, shu jumladan axborot texnologiyalaridan foydalanib sodir etilgan bo‘lsa) bilan jinoyat ishi qo‘zg‘atilib, K.S.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.
Izoh (0)