Ижтимоий тармоқларда аккаунт сотаман, дея фуқароларнинг пулларини ўзлаштирган 20 ёшли йигит қўлга олинди. Бу ҳақда Киберхавфсизлик маркази матбуот хизмати хабар берди.
Маълум қилинишича, Тошкент шаҳри Учтепа туманида яшовчи 21 ёшли С.И. ички ишлар органларига мурожаат қилиб, банк картасидан 850 минг сўм миқдоридаги пул маблағлари номаълум шахс томонидан фирибгарлик йўли билан ўзлаштирилганлигини маълум қилган.
Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Тошкент вилояти Ангрен шаҳрида яшовчи 20 ёшли К.С. содир этганлиги аниқланди.
Гумонланувчи сифатида тергов ҳаракатларига жалб этилган К.С жабрланувчи С.И. билан Telegram орқали танишиб, Mobile Legends Bang аккаунтини сотиши ҳақида айтиб алдаган. Шундан сўнг ўзининг фойдаланувида бўлган банк картасига 850 минг сўм пулни ўтказиб олган ва ёзишмаларни ўчириб юбориб, пулларини ўз эҳтиёжларига сарфлаб юборган.
Мазкур ҳолат юзасидан ЖКнинг 168-моддаси 3-қисми “г” банди (фирибгарлик ахборот тизимидан, шу жумладан ахборот технологияларидан фойдаланиб содир этилган бўлса) билан жиноят иши қўзғатилиб, К.С.нинг содир этилиб, фош этилмай қолган бошқа шу турдаги жиноятларга алоқадорлигини текшириш мақсадида тергов, тезкор-қидирув ҳаракатлари давом эттирилмоқда.
Изоҳ (0)