Toshkent shahar, Mirobod tumanida yashovchi 29 yoshli N.Sh. IIOga murojaat qilib, bank kartasidan 61,5 mln so‘m pul mablag‘lari nomaʼlum shaxs tomonidan o‘zlashtirilganligini maʼlum qilgan. Bu haqda Kiberxavfsizlik markazi xabar berdi.
Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, sudlanib, Zangiota tumani IIB Probatsiya bo‘limida hisobda turib, ATI tariqasidagi jazo muddatini o‘tayotgan 46 yoshli A.A. hamda Toshkent shahri, Shayxontohur tumanida yashovchi 33 yoshli E.A.lar sodir etganligi aniqlangan.
Unga ko‘ra, A.A. va E.A.lar jabrlanuvchi N.Sh. bilan Telegram orqali tanishib, unga SMS (soxta havola) yuborish orqali shaxsiy maʼlumotlarini qo‘lga kiritib, uning nomiga bank karta rasmiylashtirgan. Shundan so‘ng N.Sh.ning bank kartasi hisobida bo‘lgan 61,5 mln so‘m miqdoridagi pullarni o‘zining foydalanuvida bo‘lgan bank kartasiga o‘tkazib olgan.
Mazkur holat yuzasidan A.A. va E.A.larga nisbatan JKning 168-moddasi 3-qismi “g” bandi (firibgarlik axborot tizimidan, shu jumladan axborot texnologiyalaridan foydalanib sodir etilgan bo‘lsa) bilan jinoyat ishi qo‘zg‘atilib, tergov harakatlari olib borilmoqda.
Izoh (0)