Moskva shahrida 13 yil oldin O‘zbekistonda sodir etgan jinoyati uchun xalqaro qidiruvda bo‘lgan shaxs qo‘lga olindi. Bu haqda Rossiya poytaxtining Ichki ishlar bosh boshqarmasi matbuot xizmati xabar berdi.
Mavjud ma’lumotlarga ko‘ra, ushbu shaxs 2010-yilda o‘zi bilan birga yashab kelgan ayolni o‘ldirib, uning 7 ming dollar va 5 million so‘m pulini, shuningdek, jabrlanuvchining mobil telefonini o‘g‘irlagan va Rossiya hududida yashiringan. Shu bois holat yuzasidan xalqaro qidiruv e’lon qilingan.
O‘zbekistonda holat yuzasidan Jinoyat kodeksining 97- (qasddan odam o‘ldirish) va 164-moddalari (bosqinchilik) bilan jinoyat ishi qo‘zg‘atilgan.
Tezkor-qidiruv tadbirlari davomida gumonlanuvchi Moskva tergovchilari tomonidan Olmaota ko‘chasida ushlangan. U huquq-tartibot xodimlariga soxta pasportni ko‘rsatgan, aniqlanishicha, erkak hujjatdagi fotosuratni qayta yopishtirgan. Gumonlanuvchiga nisbatan qamoqqa olish ehtiyot chorasi qo‘llangan va u endilikda ekstraditsiya qilinadi.
Avvalroq Latviyada o‘zini elchixona xodimi sifatida tanishtirib, odamlarni chuv tushirib yurgan O‘zbekiston fuqarosini ekstraditsiya qilingani to‘g‘risida xabar berilgandi. Shuningdek, mart oxirlarida Interpolning O‘zbekistondagi Milliy markaziy byurosi xodimlari tomonidan xalqaro qidiruvda bo‘lgan shaxsni ekstraditsiya qilish Shvetsiyadan birinchi marta amalga oshirildi.
Izoh (0)