O‘zbekistonda biznes-ombudsman tomonidan tadbirkorlarning huquqlarini himoya qilish borasida 3 126 ta taʼsir chorasi qo‘llanildi. Bu haqda Biznes-ombudsman devoni axborot xizmati xabar berdi.
Ma’lum qilinishicha, 2023-yilning 11 oyi davomida biznes-ombudsmanga tadbirkorlardan 8 mingdan ortiq murojaat kelib tushgan. Murojaatlar xususiyatlari bo‘yicha tahlil etilganda:
- 19 foizi soliqqa oid;
- 13 foizi yer, kadastr va arxitekturaga;
- 14 foizi sud qarori va sud qarori ijrosiga;
- 12 foizi bank, kreditga;
- 7 foizi infratuzilma va boshqa masalalarga oid.
Shuningdek, “Tadbirkor virtual ofisi orqali 9 034 ta murojaat kelib tushgan bo‘lib, mazkur murojaatlarni ko‘rib chiqish natijasida tadbirkorlarga 19,4 milliard so‘mdan ortiq kredit ajratilishi, 10,2 milliard so‘m miqdorida asossiz to‘langan soliq summalari qaytarilishi, 3,5 milliard so‘m pul mablag‘larini masʼul idoralardan undirilishida yordam ko‘rsatilgan.
Shu bilan birga, aniqlangan qonunbuzilishi holatlari bo‘yicha 27 ta taqdimnoma kiritilgan, 140 nafar mansabdor shaxsga nisbatan maʼmuriy bayonnoma rasmiylashtirilgan, 65 nafar masʼul shaxsga intizomiy jazo chorasi qo‘llanilgan.
Biznes-ombudsman tomonidan o‘tgan vaqt davomida tadbirkorlarning huquqlarini himoya qilish borasida 3 126 ta taʼsir chorasi qo‘llanilgan:
- 33,5 milliard so‘mlik 121 ta daʼvo arizasi;
- 107 ta taqdimnoma;
- 23 ta ogohnoma;
- 47 ta xulosa;
- 2 828 ta maʼmuriy bayonnoma shular jumlasidandir.
Natijada, 17,1 milliard so‘mlik daʼvo tadbirkorlar foydasiga qanoatlantirilgan, 16 ta qaror (hujjat) bekor qilingan va 126 nafar masʼul shaxs intizomiy javobgarlikka tortilgan, 37 million so‘mdan ortiq asossiz hisoblangan qarzdorlik bekor qilingan.
Avvalroq Qashqadaryoda eksportyorning 414 million so‘mlik noqonuniy soliq qarzdorligi va uning 200 mln so‘mdan oshiq foizi bekor qilingani to‘g‘risida xabar berilgandi.
Izoh (0)