Namangan viloyatining Kosonsoy tumanida tadbirkor murojaatini o‘z vaqtida ko‘rib chiqmagan “Hududgaz Namangan” korxonasi vakili javobgarlikka tortildi. Bu haqda Biznes ombudsman matbuot xizmati xabar berdi.
Maʼlum qilinishicha, biznes ombudsmanga Kosonsoy tumanida faoliyat yurituvchi tadbirkor “Teks-L” MCHJ (nomi o‘zgartirilgan) rahbari murojaat qilib, o‘z murojaatida jamiyatga gaz taʼminoti filiali tomonidan tabiiy gaz uchun limit ajratib berilmayotganligi hamda shartnoma rasmiylashtirib berilmaganligini bayon qilgan.
Tadbirkor murojaati biznes ombudsman masʼul xodimlari tomonidan qonunchilikda belgilangan tartibda o‘rganib chiqilib, gaz taʼminoti filiali tomonidan tabiiy gaz limitlari doirasida tadbirkor bilan gaz yetkazib berish va qabul qilish shartnomasi tuzilishi taʼminlangan.
Shuningdek, tadbirkorning tabiiy gaz limiti ajratish va shartnoma tuzish to‘g‘risidagi murojaatini o‘z vaqtida ko‘rib chiqmaganligi sababli “Hududgaz Namangan” gaz taʼminoti korxonasi mansabdor shaxsiga nisbatan Maʼmuriy javobgarlik to‘g‘risidagi kodeksiga asosan maʼmuriy javobgarlik belgilanib, tadbirkor huquqlari tiklanishiga ko‘maklashilgan.
Izoh (0)