Qashqadaryoda daryodan qum-shag‘al noqonuniy qazib olinishi bo‘yicha ikki holat aniqlandi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Bu prokuratura organlari, Ekologiya vazirligining “Xavfsiz daryo boshqarmasi” davlat muassasasi hamda Qashqadaryo viloyati ekologiya boshqarmasi tomonidan Qarshi tumani hududidan oqib o‘tuvchi Qashqadaryo daryosida o‘tkazilgan reyd davomida aniqlangan.
Reyd davomida ma’lum bo‘lishicha, daryo qirg‘og‘idagi muhofaza mintaqasida fuqaro F.K. noqonuniy tarzda tabiiy qum mahsulotlarini o‘z ehtiyojlari uchun maʼlum bir haq evaziga qazib yurgan. Buning uchun 1 dona Doosan Solar 300LC-V rusumli ekskavator va “KamAZ” yuk mashinasidan foydalangan.
Oqibatda tabiatga 19,4 milliard so‘mdan ortiq zarar yetkazilgan.
Qayd etilishicha, fuqaro F.K. qum-shag‘alni noqonuniy qazigani uchun avval ham bir necha marta javobgarlikka tortilgan, ammo bundan tegishli xulosa chiqarmagan.
Shuningdek, mazkur hududda fuqaro R.Q. tomonidan 1 dona ekskavator, Shacman va “KamAZ” yuk mashinalari yordamida tabiiy qum mahsuloti noqonuniy tarzda qazib olinayotgani aniqlandi. Tabiatga yetkazilgan zarar miqdori 22,1 milliard so‘mdan oshgan.
Holatga huquqiy baho berish va aybdorlarga nisbatan qonuniy chora ko‘rishni taʼminlash maqsadida tegishli hujjatlar Bosh prokuraturaga yuborilgan. Texnika vositalari jarima maydoniga joylashtirilgan.
Ma’lumot uchun, Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanidagi noruda materiallarni qazib olishga 2024-yil 1-maydan muddatsiz moratoriy joriy qilingan.
Izoh (0)