Rejissyor Deni Vilnev “Dyuna: Ikkinchi qism” filmini Kanadaning Kvebek shahridagi hospis bemori uchun film premyerasidan avval qo‘yib berdi. Shunday qilib, resjissyor bemorning so‘nggi istagini amalga oshirdi. Bu haqda “Pravila jizni” nashri xabar bermoqda.
Kanadada joylashgan hospis (umri tugab borayotgani aniq bo‘lgan og‘ir bemorlar kasalxonasi)ning bir bemori Dyuna filmini yaxshi ko‘rar edi va uning ikkinchi qismini ko‘rishni juda istar, lekin film premyerasigacha yashay olmasligidan qo‘rqaкdi. U orzusi haqida shifokori Joze Ganyonga aytib berdi. Shifokor bemorining iltimosini ijtimoiy tarmoqlarga joylashtirgach, uning postini kanadalik rejissyor Sebastyan Pilot o‘qib qoladi va Joze Ganyonni rejissyor Vilnev bilan tanishtiradi.
Bemorning iltimosini eshitgach, rejissyor uni Los-Anjelesdagi premyeraga taklif etadi, biroq og‘ir kasallikdan bemor uzoq yo‘lga chiqa olmas, yaqin kunlarda vafot etishi muqarrar edi.
Shunda rejissyor Deni Vilnev film premyerasiga bir yarim oy qolganiga qaramay hospisga o‘z yordamchisini yuboradi va bemor filmni noutbuk orqali ko‘rishga muvaffaq bo‘ladi.
Filmni ko‘rish vaqtida yordamchi va bemor shifoxona palatasida yolg‘iz qolishi va hospis xodimlari ma’lumotlarni oshkor qilmasligi to‘g‘risida hujjatni imzolaydi.
Bemor ahvoli og‘ir va zaifligidan filmni oxirigacha ko‘ra olmay uxlab qoladi. Oradan ko‘p o‘tmay u vafot etgan.
Shifokor Ganyon ushbu voqea haqida faqatgina film premyerasi bo‘lib o‘tganidan so‘ng ommaga aytib berdi va bemorning so‘nggi iltimosini bajarishga yordam bergan barchaga o‘z minnatdorchiligini bildirdi.
Izoh (0)