Netflix filmlari o‘ziga xos sifati bilan millionlab foydalanuvchilar ko‘nglidan allaqachon joy olgan, striming xizmatining yuqori ko‘rsatkichlari buni doim tasdiqlaydi. Quyida so‘nggi yillarda kompaniyaga katta mashhurlik olib kelgan filmlar ro‘yxatini havola etamiz.
“Qush qutisi”, 2018-yil
Ko‘zga ko‘rinmas yovuz kuchlar aholining ko‘p qismini o‘z joniga qasd qilishga undaganidan besh yil o‘tib, film qahramoni va uning ikki farzandi bunday yerlardan qochishga jon-jahdi bilan urinadi.
“Irlandiyalik”, 2019-yil
Bir kun kelib u yirik jinoyatchiga aylanishini xayoliga ham keltirmagan edi. Ammo taqdir taqozosi bilan o‘spirin bola Rassell Bufalinoga duch keladi va uning mayda, ammo qonunga zid bo‘lgan maxsus topshiriqlarini bajarishga majbur bo‘ladi.
“Tayler Reyk: qutqaruv operatsiyasi”, 2020-yil
Film qahramoni topshiriq bilan Bangladeshga yuboriladi, biroq uning keyingi missiyasi omon qolish uchun kurashga aylanadi.
“Kechirilmas ayb”, 2021-yil
Rut Steyler qotillik sodir etgani uchun jazo muddatini o‘tab, endigina qamoqdan chiqqan edi. Endi u o‘z hayotini boshidan boshlashni va tashlab ketishga majbur bo‘lgan singlisini topishni istaydi. Ammo jamiyat uning gunohini kechirishga hali tayyor emas.
“Tepaga qaramang”, 2021-yil
Ikki nafar astronom butun insoniyatni Yer shariga yaqinlashib kelayotgan halokatli kometa haqida ogohlantirish uchun media-turga boradi.
“Qizil ogohlantirish”, 2021-yil
Federal qidiruv byurosi agenti butun dunyoda qidiruvga berilgan san’at asarlari o‘g‘risi ortidan ta’qib qilayotgan paytda beixtiyor o‘g‘rilikka sherik bo‘lib qoladi.
“Binafsharang yuraklar”, 2022-yil
San’atga endi kirib kelgan yosh qo‘shiqchi qiz harbiy-dengiz askari bilan soxta nikoh quradi, ammo yaqin orada uni chindan ham sevib qolishini xayoliga ham keltirmaydi.
“Adam loyihasi”, 2022-yil
Adam Rid vaqt mashinasida o‘tmishga sayohat qilgan payt 12 yoshli davriga borib qoladi. Endi ortga qaytish uchun unga faqat o‘zining bolaligi yordam bera oladi.
“Kulrang odam”, 2022-yil
Markaziy razvedka boshqarmasining sobiq agenti o‘z hamkasblarining nishoniga aylanadi. Endi u buyog‘iga qanday yo‘l tutish kerakligi haqida qaror qabul qilishi kerak.
“Qinidan chiqqan pichoqlar-2”
Jahonga mashhur detektiv Benua Blan milliarder do‘stining barcha sirlarini fosh etish uchun Gretsiyaga yo‘l oldi.
Izoh (0)