Turkiya kino sanoatining haqiqiy yulduziga aylangan, bir nechta xorijiy tillarga tarjima qilingan “Muhtasham yuz yil” seriali butun dunyo tomoshabinlari qalbidan chuqur joy olgan. Serial shunchalik qiziqarli-ki, undagi voqealar real hayotda ham sodir bo‘lgan deb ko‘pchilik ishonadi. Aslida esa serialda tarixga zid bo‘lgan voqealar va personajlar juda ko‘p.
Ehtimol, Xurram sulton dunyodagi eng mashhur kanizaklardan bo‘lsa kerak. “Muhtasham yuz yil” serialida aktrisa Meryem Uzerli o‘z obrazini mahorat bilan ijro etgani uchun ko‘pchilik Xurram xonim hayotda ham shunday xarakterga ega deb o‘ylaydi, biroq bularning bari haqiqatdan yiroqdir.
1-yanglish fikr: Xurram saroyda omon qolish uchun doim fitna uyushtirgan
Serial syujetiga ko‘ra, Aleksandra Sulaymon sulton saroyida o‘z hayotini saqlab qolish uchun raqiblar orasida fitna qo‘llaydi, uning xiylalari saroy ahli bir-biriga dushman bo‘lishiga olib keladi. Shuningdek, Xurram farzandlari manfaati uchun Sulaymon his-tuyg‘ulari bilan o‘ynaydi.
Ammo bularning bari to‘qima syujetdir. Tarixchilarning so‘zlariga ko‘ra, Aleksandra hayotda chuqur ilmga ega oqila ayol bo‘lganligi sababli davlat ishlarida faol ishtirok etgan, u bir nechta xorijiy tillarni mukammal bilgan. Shuningdek, bo‘sh vaqtini fitnachilik bilan emas, balki ilm egallashga sarflagan.
2-yanglish fikr: Xurram Sulton saroydagi kanizaklar bilan raqobatlashgan
Serialda Xurram doim kanizaklar bilan raqobatlashib, ularni sultondan chetlashtirishga urinib keladi. Tarixda esa sulton Aleksandraga uylangach, haramdagi barcha kanizaklarni tarqatib yuboradi. Sulaymonning yagona umr yo‘ldoshi — Xurram sulton “haseki” unvoniga ega bo‘ladi (serialda Moxidavronga ham shunday unvon berilgani katta xatolik edi). Demak, Xurramning dushmanlari bo‘lmagan.
3-yanglish fikr: Xurram go‘zallikda tengi yo‘q, Sulaymon ham kelishgan kishi bo‘lgan
Tabiatan go‘zal aktrisa Meryem Uzerli serialda yorqin liboslarda Xurram obrazini mohirona gavdalantirgan. Tarixda esa Aleksandra Roksolana past bo‘yli, og‘ir vaznli ayol bo‘lgan. Uning burni katta, lablari ingichka, qoshlarining rangi ochligidan deyarli bilinmagan.
Sulaymon sulton rolini ijro etgan Halit Ergench o‘zining tashqi ko‘rinishi bilan ko‘pgina tomoshabinlarga manzur bo‘lgan, ammo tarixiy sulton ham ideal emas edi: Sulaymonning ko‘rinishi semiz bo‘lgan, doimiy egarda yurgani uchun oyoqlari deformatsiyalangan. Serialdagidek soqoli ham bo‘lmagan, bo‘yi 165 santimetrdan oshmagan.
Shunday qilib, “Muhtasham yuz yil” serialiga faqatgina yirik tarixiy voqealar va faktlar asos qilib olingan.
Izoh (0)