Deni Vilnyovning “Dyuna” nomli fantastik blokbasteri kassa yig‘imlari bo‘yicha 100 million dollarlik marradan o‘tib ketdi (100,3 million dollar). Bunga 22-oktabr kuni AQSh prokatiga chiqishidan oldin erishilgan, deb xabar beradi “Film.ru”.
Mazkur film sentabr o‘rtalarida Rossiya, Fransiya, Janubiy Koreya va boshqa davlatlardagi 32 ta maydonchada taqdim etilgan. Rossiya prokatida kartina 18,2 million dollardan ortiq mablag‘ to‘plagan bo‘lib, hozircha u mamlakatda yilning eng yaxshi kassa yig‘imi hisoblanadi.
“Dyuna”ning ishlab chiqarish budjeti 165 million dollarni tashkil etgan — lenta o‘zini oqlashi uchun kamida ikki barobar ko‘proq mablag‘ to‘plashi kerak (330 million dollar). AQShdan tashqari film parallel ravishda HBO Max strim-servisida ham namoyish etiladi, yirik maydonchalar orasida faqat Xitoy qolmoqda (22-oktabr).
Venetsiyadagi jahon premyerasidan keyin Vilnyov agarda Warner Bros. studiyasi loyihani davom ettirishga ruxsat bersa, 2022-yilning kuzidan “Dyuna”ning sikvelini suratga olishni boshlashga va’da bergandi. Hozirda rahbariyat tomonidan rasmiy bayonot berilmagan.
Avvalroq Bred Pitt va Jorj Kluni “O‘rgimchak odam” rejissorining yangi trillerida birga suratga tushishi, Skarlett Yoxansson va Disney o‘rtasidagi kelishmovchilikka barham berilgani to‘g‘risida xabar berilgandi.
Izoh (0)