Malayziya rasmiylari, agar yangi dalillar paydo bo‘lsa, 10 yil avval Kuala-Lumpurdan Pekinga MH370 reysida g‘oyib bo‘lgan Malaysia Airlines samolyotiga oid tergovni qayta boshlashga tayyor. Bu haqda mamlakat bosh vaziri Anvar Ibrohim bergan axborotga tayanib, Reuters xabar berdi.
Bizningcha, agar ishni qayta ochish kerakligi haqida yangi ishonchli dalillar paydo bo‘lsa, biz bundan, albatta, xursand bo‘lamiz, — dedi bosh vazir Avstraliyada jurnalistlarga.
Avvalroq Malayziya transport vaziri Entoni Loke Sieu Fuk departament yo‘qolgan samolyotni qidirishni qaytadan boshlash niyatida ekanligini ma’lum qilgan. Uning so‘zlariga ko‘ra, bu maqsadda Amerikaning Ocean Infinity kompaniyasi jalb etilishi mumkin.
Reuters’ga ko‘ra, Avstraliya, Xitoy va Malayziyaning birgalikdagi samolyot qidiruvi 2017-yil yanvarida hech qanday natija bermay yakunlangan.
Malaysia Airlines aviakompaniyasiga tegishli Boeing 777-200 2014-yil 8-martga o‘tar kechasi Kuala-Lumpurdan Pekinga uchgan va taxminan ikki soatdan keyin radarlardan g‘oyib bo‘lgan. Samolyot bortida 227 nafar yo‘lovchi va 12 nafar ekipaj a’zosi bo‘lgan. 2015-yil yanvarida Malayziya rasmiylari samolyot halokatga uchraganini va bortdagilarning barchasi halok bo‘lganini tan olgan. Yo‘qolgan samolyotning izlari hanuz topilmagan.
Izoh (0)