Toshkent shahridagi zavodlardan birida bojxona xodimlari tomonidan noqonuniy muomaladan olib qo‘yilgan 110 ming quti tamaki mahsulotlarini yo‘q qilish tadbiri bo‘lib o‘tdi.
Tadbirda Bojxona qo‘mitasi va Majburiy ijro bo‘limi xodimlari hamda ommaviy axborot vositalari vakillari ishtirok etdi.
Masʼullarga ko‘ra, maxsus pechlarda yoqib yuborilgan noqonuniy tamaki mahsulotlari tezkor tadbir chog‘ida Sirdaryo viloyatidagi yashash xonadonlarining birida aniqlangan. Mahsulotlarning umumiy qiymati 1,2 milliard so‘mni tashkil atadi.
Sigaretalarni O‘zbekiston hududiga aylanma yo‘llar orqali, noqonuniy ravishda olib kirib, sotmoqchi bo‘lgan shaxs sud hukmiga asosan 8 yilga ozodlikdan mahrum qilingan.
Tadbirda kontrabanda yo‘li bilan mamlakatga keltirilgan, aksiz markasiz va boshqa qonuniy talablarga javob bermaydigan tamaki mahsulotlari olovda yoqildi.
Shundan so‘ng, ishtirokchilar uchun brifing o‘tkazildi. Muloqotda Bojxona qo‘mitasi masʼullari OAV vakillarining mavzuga doir savollariga javoblar qaytardi.
Maʼlum qilinishicha, o‘tgan davrda 2 million qutidan ortiq tamaki mahsulotlari keng jamoatchilik ishtirokida yo‘q qilingan.
“Bojxona organlari tomonidan 2023-yilda 291 ta holatda qiymati 92,2 milliard so‘mlik 5,7 million quti noqonuniy tamaki mahsulotlari muomaladan olingan. Joriy yilning o‘tgan davrida esa 56 ta holatda 14 milliard so‘mlik 528 ming 740 quti tamaki mahsulotlari bilan bog‘liq huquqbuzarliklar aniqlangan”, — dedi Bojxona qo‘mitasi boshqarma boshlig‘i Akromjon Ahlimirzayev.
Shu bilan birga, brifingda 2023-yilda ushlab qolingan noqonuniy tamaki mahsulotlaring miqdori 2022-yildagiga nisbatan 3,5 barobarga oshgani taʼkidlandi.
Sheriklik huquqi asosida.
Izoh (0)