Тошкент шаҳридаги заводлардан бирида божхона ходимлари томонидан ноқонуний муомаладан олиб қўйилган 110 минг қути тамаки маҳсулотларини йўқ қилиш тадбири бўлиб ўтди.
Тадбирда Божхона қўмитаси ва Мажбурий ижро бўлими ходимлари ҳамда оммавий ахборот воситалари вакиллари иштирок этди.
Масъулларга кўра, махсус печларда ёқиб юборилган ноқонуний тамаки маҳсулотлари тезкор тадбир чоғида Сирдарё вилоятидаги яшаш хонадонларининг бирида аниқланган. Маҳсулотларнинг умумий қиймати 1,2 миллиард сўмни ташкил атади.
Сигареталарни Ўзбекистон ҳудудига айланма йўллар орқали, ноқонуний равишда олиб кириб, сотмоқчи бўлган шахс суд ҳукмига асосан 8 йилга озодликдан маҳрум қилинган.
Тадбирда контрабанда йўли билан мамлакатга келтирилган, акциз маркасиз ва бошқа қонуний талабларга жавоб бермайдиган тамаки маҳсулотлари оловда ёқилди.
Шундан сўнг, иштирокчилар учун брифинг ўтказилди. Мулоқотда Божхона қўмитаси масъуллари ОАВ вакилларининг мавзуга доир саволларига жавоблар қайтарди.
Маълум қилинишича, ўтган даврда 2 миллион қутидан ортиқ тамаки маҳсулотлари кенг жамоатчилик иштирокида йўқ қилинган.
“Божхона органлари томонидан 2023 йилда 291 та ҳолатда қиймати 92,2 миллиард сўмлик 5,7 миллион қути ноқонуний тамаки маҳсулотлари муомаладан олинган. Жорий йилнинг ўтган даврида эса 56 та ҳолатда 14 миллиард сўмлик 528 минг 740 қути тамаки маҳсулотлари билан боғлиқ ҳуқуқбузарликлар аниқланган”, — деди Божхона қўмитаси бошқарма бошлиғи Акромжон Аҳлимирзаев.
Шу билан бирга, брифингда 2023 йилда ушлаб қолинган ноқонуний тамаки маҳсулотларинг миқдори 2022 йилдагига нисбатан 3,5 баробарга ошгани таъкидланди.
Шериклик ҳуқуқи асосида.
Изоҳ (0)