Xorazmdagi mehribonlik uyidagi jinsiy zo‘ravonlik ishi bo‘yicha aybdorlarga jazo tayinlangandi. Ular jazoni o‘tash uchun qamoqqa emas, manzilli koloniyaga yuborilgani oshkor bo‘ldi.
Pedofillar bo‘yicha sud hukmi 2023-yil 3-noyabr kuni Jinoyat ishlari bo‘yicha Toshkent shahar sudi appelyatsiya hayʼatida o‘qilgandi. Unga ko‘ra, Xorazm viloyati Adliya boshqarmasi sobiq rahbari Oybek Masharipov 3 yilga va Yangiariq tumani FVV sobiq boshlig‘i Anvar Kuryazov 2 yilga ozodlikdan mahrum qilingan.
Sud hukmi hujjati bilan tanishgan Inson huquqlar “Ezgulik” jamiyati raisi Abdurahmon Tashanovning ma’lum qilishicha, o‘sha kuni bo‘lib o‘tgan brifingda huquq tizimi kattalari bir “kichkinagina” epizodni yashirib ketgan. Ya’ni, pedofillar jazoni o‘tash uchun qamoqqa emas, manzilli koloniyaga yuborilgan. Bundan tashqari, ularning dastlabki suddan beri uylarida o‘tkazgan vaqtlari jazo muddatidan chegirib tashlangan.
“Qozilarimiz shu qadar ayyor ekanki, jamoatchilikni ‘pedofillar uzil-kesil 3 yil qamoqda o‘tiradi’ degan gapga ishontirgan ekan. Aslida esa ular bor-yo‘g‘i 2 yildan ko‘proq manzil koloniyada o‘tirishadi, u yerdagi barcha shart-sharoitlardan foydalanishadi.
Biz bekorga shuncha baqir-chaqir qilibmiz. Pedofillar, pedofiliya jinoyatlari haqida gapirgan vaqtimizni ilm olishga sarflaganimizda, ‘Sulton suyagini xorlamas’, ‘Qarg‘a qarg‘aning ko‘zini cho‘qimas’ degan naqllarning mag‘zini chaqqan bo‘lardik”, — deydi Abdurahmon Tashanov.
U sud yopiq bo‘lgani sababli hukmdagi boshqa tafsilotlarni e’lon qila olmasligini aytib o‘tdi.
Izoh (0)