Ukraina prezidenti Vladimir Zelenskiy Aleksandr Sirskiyni Ukraina Qurolli kuchlariga yangi bosh qo‘mondon etib tayinladi. Bu haqda u navbatdagi videomurojaatida ma’lum qilgan.
“Men general-polkovnik Aleksandr Sirskiyni Ukraina Qurolli kuchlari bosh qo‘mondoni etib tayinladim”, — dedi Vladimir Zelenskiy videomurojaatda.
Shuningdek, u avvalgi bosh qo‘mondon Valeriy Zalujniyga 2 yillik xizmati uchun minnatdorlik bildirib o‘tdi.
“Ikki yillik xizmat uchun general Zalujniydan minnatdorman. Men birgalikda erishgan har bir g‘alabamiz uchun minnatdorman va bu urushni qahramonlarcha boshdan kechirayotgan barcha ukrainalik askarlarga rahmat. Armiyada nimalarni o‘zgartirish kerakligi haqida bugun ochiq gaplashdik. Shoshilinch o‘zgarishlar zarur. Men general Zalujniyni Ukraina jamoasida qolishga taklif qildim. Agar rozi bo‘lsa, minnatdor bo‘lardim”, — dedi Ukraina prezidenti.
Avvalroq Valeriy Zalujniy bosh qo‘mondon vazifasidan ozod etilgani haqida gap-so‘zlar tarqalgan, lekin rasman e’lon qilinmagandi.
Izoh (0)