Kuchli shamol sabab Samarqand va Jizzax viloyatlari elektr ta’minotida uzilishlar yuz berdi

Kuchli shamol sabab 7-fevral kuni Samarqand va Jizzax viloyatlari elektr ta’minotida uzilishlar yuz berdi.

Energetika vazirligi matbuot xizmatining ma’lum qilishicha, ushbu hududlarda kuzatilgan kuchli shamol sabab ba’zi bir elektr qurilmalarida nosozliklar yuz bergan. Buning natijasida Samarqand viloyatida 457 MVt (114 ming 250 ta iste’molchi), Jizzax viloyatida esa 64 MVt (16 mingta iste’molchi) quvvat bilan elektr ta’minotida vaqtinchalik qisqa muddatli uzilishlar kuzatilmoqda.

Hozirgi vaqtda maxsus brigadalar tomonidan ta’mirlash ishlari olib borilmoqda. Nosozliklar qisqa vaqt ichida bosqichma-bosqich bartaraf qilinib, iste’molchilarning elektr ta’minoti qayta tiklanadi.

Vazirlik keltirilgan noqulayliklar uchun iste’molchilardan uzr so‘radi.