Panorama Airways tomonidan parvozlarning kechikishi tufayli O‘zbekiston fuqarolari umra safaridan qayta olmayotgani haqida xabar berilgan edi. Bosh prokuratura holat yuzasidan jinoyat ishi qo‘zg‘atilganini ma’lum qildi.
Ma’lum bo‘lishicha, fuqarolarni umra safaridan qaytarish choralarini ko‘rmagan hamda boshqa jiddiy qonun buzilish holatlariga yo‘l qo‘ygan xususiy aviakompaniya mansabdorlariga nisbatan qo‘zg‘atilgan jinoyat ishi yuzasidan Transport prokuraturasi tergov harakatlarini olib bormoqda.
Jinoyat ishi doirasida bir nafar shaxsga nisbatan qamoqqa olish ehtiyot chorasi qo‘llanilgan.
Ish bo‘yicha haqiqatni aniqlashga to‘sqinlik qilish holatlarining oldini olish maqsadida boshqa tafsilotlar oshkor qilinmaydi, — deyiladi xabarda.
Avvalroq O‘zbekistonning Jidda shahridagi Bosh konsulxonasi ziyoratchilarning bir qismi O‘zbekistonga qaytarilganini, qolgan fuqarolar ham yaqin fursatlarda vatanga yuborilishini ma’lum qilgandi.
Turizm qo‘mitasi umra xizmatlarini sifatsiz ko‘rsatilishidan jabr ko‘rgan ziyoratchilar o‘rnatilgan tartibda murojaat etishlari mumkinligini hamda ularga yetkazilgan moddiy va ma’naviy zarar sud qaroriga muvofiq undirib berilishini bildirgan.
Izoh (0)