O‘zbekiston banklaridagi umumiy pul tushumlarining hajmi (naqd pul va terminallar orqali) 2023-yilda 669 trillion so‘mni tashkil etdi, ko‘rsatkich 2022-yilga nisbatan 28 foizga ko‘p. Bu haqda Markaziy bank sharhida so‘z boradi.
Regulyator maʼlumotlariga ko‘ra, banklarga naqd pul tushumlari yil davomida 20 foizga oshib, 414 trillion so‘mni tashkil etgan. Shunga qaramay, naqd pul ulushi 66 foizdan 62 foizga tushgan (2021-yilda 69 foizni tashkil etgandi).
Terminallar orqali tushumlar 44 foiz — 255 trillion so‘mga, ularning ulushi — 34 foizdan 38 foizga (2021-yilda — 31 foiz) o‘sgan.
2023-yilda bank kartalariga 789 trillion so‘m kirim qilingan. Bu ko‘rsatkich 2022-yilga nisbatan 1,4 barobarga oshgan. O‘tgan yili bank kartalaridagi 189 trillion so‘m mablag‘lar naqdlashtirib olingan.
2022-yilda bank kartalarga kelib tushgan mablag‘larning 27 foizi naqdlashtirib olingan bo‘lsa, bu ko‘rsatkich 2023-yilda 24 foizni tashkil etgan.
Eslatib o‘tamiz, 2023-yilning olti oyida bank kassalaridan (shu jumladan, bankomatlardan) berilgan naqd pullar 2022-yil mos davriga nisbatan 14,2 foizga ko‘paygan va 187,3 trillion so‘mni tashkil etgandi.
Izoh (0)