Mirobod tumani hokimligi ijtimoiy tarmoqlarda tumandagi katta yashil maydon yo‘q qilinish xavfi ostida qolayotgani aytilgan xabarlarga munosabat bildirdi.
Qayd etilishicha, Facebook ijtimoiy tarmog‘ida tarqalgan murojaatdagi hudud – 7-sonli harbiy shaharcha Mirobod tumani Avliyo ota ko‘chasi 124-uy manzilida joylashgan.
Davlat aktivlarini boshqarish agentligi Toshkent shahar boshqarmasi tomonidan ushbu hudud 2021-yil 10-dekabrdagi 21-sonli davlat orderiga asosan New Car Land masʼuliyati cheklangan jamiyat nomiga o‘tkazilgan.
Bugungi kunda ikkita MCHJ, yaʼni New Car Land masʼuliyati cheklangan jamiyati hamda ETALON-Construction MCHJlar ushbu yer maydoniga egalik qilib kelmoqda.
“Shu kungacha tegishli tashkilotlarga ushbu yer maydonida qurilish ishlarini amalga oshirish bo‘yicha birorta murojaat kelib tushmagan hamda tuman atrof-muhitni muhofaza qilish, ekologiya va iqlim o‘zgarishi bo‘linmasi tomonidan hududdagi daraxtlar muhofazasi bo‘yicha choralar ko‘rilib, masʼullarga ogohlantirish berilgan”, — deyiladi munosabatda.
Avvalroq Qashqadaryoda kanal qirg‘og‘ini rekonstruksiya qilish vaqtida 150 ta daraxt qo‘porib tashlangani, Xorazm viloyati Shovot tumanida daraxtlar kesib, yoqib yuborilishi oqibatida 756 million so‘m zarar yetkazilgani to‘g‘risida xabar berilgandi. Shuningdek, Sirdaryoda ariqlarni betonlashtirish jarayonida tabiatga 232 million so‘m zarar yetkazilgan edi.
Izoh (0)