Ўзбекистонда қурилиш майдонига ва унга кириб-чиқиш йўлларига сув сепадиган осма ёмғирлатгичлар ўрнатилади. Бу ҳақда 6 февраль куни бўлиб ўтган Сенатнинг Оролбўйи минтақасини ривожлантириш масалалари ва экология қўмитасининг “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури лойиҳаси муҳокамасига бағишланган йиғилишда таъкидланган.
Давлат дастурида барча соҳалар каби, экология, атроф муҳитни муҳофаза қилиш, экологик барқарорликни таъминлаш, қайта тикланувчи энергия манбаларидан фойдаланишни кенгайтириш, сув ресурсларидан оқилона ва самарали фойдаланиш масалаларига алоҳида эътибор қаратилаётганлигини сенаторлар томонидан таъкидланган.
“Яшил энергия” манбалари салмоғини ошириш мақсадида жорий йилда хорижий инвесторлар иштирокида Тошкент, Қашқадарё, Бухоро, Наманган ва Навоий вилоятларида умумий қуввати 2 700 МВт бўлган 6 та йирик қуёш электр станцияларини ишга тушириш режалаштирилмоқда. Сенаторлар бу ўз навбатида мамлакатда энергетик барқарорликни таъминлашда муҳим омил бўлиб хизмат қилишини алоҳида қайд этишди.
Шунингдек, “Яшил” иқтисодиётга ўтишни таъминлаш учун қулай шароитларни янада кенгайтириш мақсадида “яшил” сертификатлар айланмаси бозор тамойиллари асосида йўлга қўйилиши назарда тутилмоқда. Шу билан бир қаторда сув ресурсларини тежаш мақсадида йирик каналларни бетонлаштириш, сувни бошқариш тизимини тубдан ислоҳ қилиш, сув тежовчи технологияларни ривожлантириш, соҳага хусусий сектор ва давлат-хусусий шериклик механизмларини кенг жорий этиш кўзда тутилмоқда.
Атмосфера ҳавосига кўрсатилаётган салбий оқибатларни камайтириш, атмосфера ҳавоси ифлосланишининг олдини олиш, иқтисодиёт тармоқларининг ҳавога чиқариладиган зарарли газлар ҳажмини 1,5 фоизга қисқартириш, чанг бўронларига қарши курашиш ва уларнинг оқибатларини юмшатиш, қурилиш майдонига ва унга кириб-чиқиш йўлларига сув сепадиган осма ёмғирлатгични ўрнатиш мажбурий этиб белгилаш масалалари назарда тутилаётганлиги қайд этиб ўтилди.
2024 йилда яшил боғлар сонини 444 тага етказиш, яшиллик даражасини 12,4 фоизга олиб чиқиш, 112 та йирик саноат корхоналарининг ҳудудида ва унга туташ ҳудудларда 2,1 миллион туп кўчатдан иборат “яшил белбоғ” лар барпо этиш, Республикада ўрмон билан қопланган майдонларни 3,65 миллион гектарга (8,1 фоизга) етказиш чораларини кўриш вазифа қилиб белгиланганлиги экологик барқарорликни таъминлашнинг муҳим омили бўлиши айтиб ўтилди.
Атроф-муҳитни муҳофаза қилиш ва сув ресурсларини тежаш йўналиши бўйича амалий чора-тадбирлар билан бир қаторда соҳада қатор норматив-ҳуқуқий ҳужжатларни ишлаб чиқиш масалалари ҳам давлат дастуридан ўрин олган. Оролбўйи минтақасида экологик вазиятни барқарорлаштириш, Орол денгизи қуриши натижасида юзага келган экологик муаммоларнинг салбий таъсирини юмшатишга қаратилган вазифалар доирасида денгизнинг қуриган тубида қўшимча 100 минг гектар яшил майдонларни барпо этиш, иқлим ўзгариши салбий таъсирининг олдини олиш, биологик хилма-хиллик ишончли сақланишини таъминлашда муҳим ўрин тутиши таъкидланди.
Сенаторлар Давлат дастури лойиҳасига бир қатор таклиф ва тавсиялар билдирди.
Изоҳ (0)