O‘zbekistonning Londondagi elchixonasida Britaniyaning AGT Poortman kompaniyasi bosh maslahatchisi Jeyms Xelford bilan mosh eksporti masalasi bo‘yicha uchrashuv bo‘lib o‘tdi. Bu haqda “Dunyo” agentligi xabar berdi.
Jeyms Xelfordning ta’kidlashicha, AGT Poortman kompaniyasi tomonidan o‘tkazilgan marketing tadqiqoti natijalariga ko‘ra O‘zbekistonda yetishtirilayotgan dukkaklilar sifati Britaniya bozorida raqobatbardosh. Shuningdek, u O‘zbekistondan 10 ming tonna mosh import qilish va O‘simliklar karantini bosh davlat inspeksiyasi bilan hamkorlikda ish boshlashga tayyorligini bildirgan.
AGT Poortman Buyuk Britaniyada 30 yildan beri faoliyat ko‘rsatib keladi. Yillik aylanmasi 2 milliard dollarni tashkil qiladi. Korxona dunyoning 16 davlati bilan don va dukkakli mahsulotlarni import qilish bo‘yicha hamkorlikni yo‘lga qo‘ygan. Dunyo bo‘ylab 45 ta ishlab chiqarish zavodlari mavjud.
Eslatib o‘tamiz, 2023-yil iyulda O‘zbekistondan piyoz eksporti rekord o‘rnatgani, O‘zbekiston o‘rik eksportida dunyo yetakchilaridan biriga aylanishi mumkinligi to‘g‘risida xabar berilgandi.
Izoh (0)