Samarqand viloyatining ikki tumanida kredit mablag‘larini o‘zlashtirgan MCHJlar aniqlandi, deb xabar beradi Bosh prokuratura huzuridagi departament.
Qayd etilishicha, departamentning Nurobod tuman bo‘limi tomonidan tergovga qadar tekshiruv o‘tkazilgan. Tadbirda “S.D.” fermer xo‘jaligi rahbari S.R. chorva mollarni sotib olish va chorvachilikni rivojlantirish maqsadida hududiy tijorat banki filialidan ajratilgan kredit evaziga sotib olingan 1 250 bosh qo‘ylarni boshqa shaxslarga sotib yuborib, jami 124,6 ming dollar miqdoridagi kredit mablag‘larini talon-toroj qilgani aniqlangan.
Shu kabi, departamentning Urgut tuman bo‘limi tomonidan o‘tkazilgan tergovga qadar tekshiruvda “W.G.” MCHJ rahbari O.S. qishloq xo‘jaligi mahsulotlarini qayta ishlash va qadoqlash uchun hududiy tijorat banki filialidan ajratilgan 5 milliard so‘m kreditning bir qismini boshqa kredit qarzdorligi uchun yo‘naltirib, 2,3 milliard so‘mni o‘zlashtirish yo‘li bilan talon-toroj qilganligi aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi.
Izoh (0)