Hukumat qarori bilan “Eng faol ijtimoiy xodim” ko‘rik-tanlovini tashkil etish va o‘tkazish tartibi to‘g‘risidagi nizom qabul qilindi, deb xabar beradi Telegram’dagi “Huquqiy axborot” kanali.
Nizomga ko‘ra, Ijtimoiy himoya milliy agentligi tizimidagi ijtimoiy xodimlar, ijtimoiy xodim assistentlari, shuningdek, nodavlat notijorat tashkilotlardagi xizmatchilarning asosiy lavozimlari va ishchilar kasblari klassifikatori bo‘yicha ijtimoiy xodimlar o‘rtasida “Eng faol ijtimoiy xodim” ko‘rik tanlovi tashkil etiladi.
Shunga ko‘ra, har yili 1-aprelgacha ko‘rik tanlov o‘tkazilishi haqida eʼlon beriladi va nomzodlar 1-apreldan 30-aprelgacha agentlik veb-sayti orqali ro‘yxatdan o‘tadi.
Ko‘rik tanlovning hududiy saralash bosqichi may oyida, respublika final bosqichi iyun oyida o‘tkaziladi.
Tanlov quyidagi sinovlar asosida o‘tkaziladi:
- ishtirokchilarning bilim darajasini aniqlashga qaratilgan ijtimoiy ish sohasidagi onlayn test sinovlari;
- ishtirokchilarning IQ (intellektual koeffitsiyent) va individual psixologik xususiyatlari darajasini aniqlashga qaratilgan sinovlar;
- ishtirokchilar bilan yakka tartibdagi suhbat.
Tanlov g‘olib va sovrindorlari har yili iyul oyining birinchi haftasida quyidagicha taqdirlanadi:
Hududiy saralash bosqichida mehnatga haq to‘lashning eng kam miqdorining quyida ko‘rsatilgan biryo‘la to‘lanadigan pul mukofoti:
- 1-o‘rin – 5 baravari (5 million 250 ming so‘m);
- 2-o‘rin – 3 baravari (3 million 150 ming so‘m);
- 3-o‘rin – 2 baravari (2 million 100 ming so‘m).
Respublika final bosqichida mehnatga haq to‘lashning eng kam miqdorining quyida ko‘rsatilgan biryo‘la to‘lanadigan pul mukofoti:
- 1-o‘rin – 20 baravari (21 million so‘m);
- 2-o‘rin – 15 baravari (15 million 750 ming so‘m);
- 3-o‘rin – 10 baravari (10 million 500 ming so‘m).
Izoh (0)