EastFruit 2023-yilning mart—iyun oylarida O‘zbekiston rekord miqdorda piyoz eksport qilganini ma’lum qildi.
Mutaxassislar mahsulotning mamlakatdan eksport qilinishiga qo‘yilgan cheklovlar bekor qilinganidan keyin o‘sishni qayd etdi. 2023-yil yanvar oyi boshida ichki bozorda anomal sovuqlikdan keyin narxlarning oshishini ushlab turish maqsadida piyoz eksporti taqiqlangan edi.
Cheklovlar aprel oyining oxirigacha 4 oylik muddatga joriy etildi. O‘zbekiston piyozi eksportining 95 foizi Yevrosiyo iqtisodiy ittifoqi mamlakatlari bozorlariga yetkazib berilgan. Asosiy davlatlar quyidagilar:
- Qozog‘iston — 129,4 ming tonna (umumiy eksportning 58,1 foizi);
- Rossiya — 70,1 ming tonna (31,4 foiz);
- Qirg‘iziston — 8,1 ming tonna (3,6 foiz);
- Belarus — 4,8 ming tonna (2,1 foiz).
Mart oyi o‘rtalaridan iyun oxirigacha xorijga 222,8 ming tonna piyoz jo‘natildi. 2022-yilning shu davriga nisbatan bu ko‘rsatkich 53 foizga oshgan.
Rossiyada piyoz narxi tarixdagi maksimal ko‘rsatkichni qayd etdi
2023-yil may oyida Rossiya do‘konlarida piyozning o‘rtacha narxi kilogrammi uchun 73,3 rublga (salkam 9500 so‘m) yetdi. Bu Rosstat kuzatuvlari tarixidagi kamida 2000-yildan buyon maksimal ko‘rsatkichdir.
O‘zbekiston, Tojikiston va Qozog‘istonda qish anomal sovuq kelishi fonida piyoz yetishmovchiligi yuzaga kelib, uning narxi qimmatlashgan.
Rossiya bozoriga piyoz yetkazib beruvchi asosiy davlatlar Misr, Xitoy, Turkiya va O‘zbekiston hisoblanadi.
2022-yilning yanvar—noyabr oylarida Rossiya ushbu mamlakatlardan mos ravishda 46 ming tonna, 22 ming tonna, 20 ming tonna va 17 ming tonna piyoz olgan.
Izoh (0)