Ўзбекистоннинг Лондондаги элчихонасида Британиянинг AGT Poortman компанияси бош маслаҳатчиси Жеймс Хелфорд билан мош экспорти масаласи бўйича учрашув бўлиб ўтди. Бу ҳақда “Дунё” агентлиги хабар берди.
Жеймс Хелфорднинг таъкидлашича, AGT Poortman компанияси томонидан ўтказилган маркетинг тадқиқоти натижаларига кўра Ўзбекистонда етиштирилаётган дуккаклилар сифати Британия бозорида рақобатбардош. Шунингдек, у Ўзбекистондан 10 минг тонна мош импорт қилиш ва Ўсимликлар карантини бош давлат инспекцияси билан ҳамкорликда иш бошлашга тайёрлигини билдирган.
AGT Poortman Буюк Британияда 30 йилдан бери фаолият кўрсатиб келади. Йиллик айланмаси 2 миллиард долларни ташкил қилади. Корхона дунёнинг 16 давлати билан дон ва дуккакли маҳсулотларни импорт қилиш бўйича ҳамкорликни йўлга қўйган. Дунё бўйлаб 45 та ишлаб чиқариш заводлари мавжуд.
Эслатиб ўтамиз, 2023 йил июлда Ўзбекистондан пиёз экспорти рекорд ўрнатгани, Ўзбекистон ўрик экспортида дунё етакчиларидан бирига айланиши мумкинлиги тўғрисида хабар берилганди.
Изоҳ (0)