Toshkent viloyati bojxona boshqarmasi ijtimoiy tarmoqlarda “G‘ishtko‘prik” chegara bojxona posti orqali o‘tayotgan yo‘lovchilarning yuklari, xususan, eski ishlatilgan tovarlar bojxona xodimlari tomonidan kiritilmayotgani aytilgan xabarlarga munosabat bildirdi.
Qayd etilishicha, ayrim fuqarolar tomonidan ijtimoiy tarmoqlarda tarqatilayotgan bu kabi xabarlar hech qanday asosga ega emas.
“Jismoniy shaxslar tomonidan bojxona chegarasi orqali tovarlarni olib o‘tishni yanada tartibga solish chora-tadbirlari to‘g‘risida” prezident qaroriga muvofiq: O‘zbekiston davlat chegaralarining avtoyo‘l (piyoda) bojxona chegaralari o‘tish punktlari orqali olib o‘tishda — 300 dollar ekvivalenti miqdoridagi tovarlarni bojsiz olib kirishingiz mumkin.
Ta’kidlanishicha, jismoniy shaxslar tomonidan bojxona chegarasi orqali olib o‘tilayotgan tovarlarning qanday maqsadga mo‘ljallanganini aniqlashda tovarlarning miqdori hisobga olinadi va bunda tovarlarni olib o‘tayotgan jismoniy shaxs va uning oila aʼzolari ehtiyojlaridan ortiq miqdordagi bir turdagi tovarlarga, agar tovarlarni olib o‘tayotgan shaxs aksini isbotlab bermasa, tadbirkorlik faoliyatida foydalanish uchun olib kirilayotgan tovarlar deb qaraladi.
Shu bilan birga, “Jismoniy shaxslar tomonidan O‘zbekiston Respublikasiga tovarlarni olib o‘tish tartibini takomillashtirishga doir qo‘shimcha chora-tadbirlar to‘g‘risida” Vazirlar Mahkamasining qarori bilan jismoniy shaxslar tomonidan davlat chegarasining avtoyo‘l (yo‘lovchi), temir yo‘l va daryo o‘tkazish punktlari orqali bojxona to‘lovlari undirilmaydigan ayrim tovarlarni (maishiy texnika) olib o‘tishning miqdor normalari belgilangan bo‘lib, bunda har bir nomdagi tovardan 2 kilogramm (bo‘linmaydigan tovarlar bundan mustasno: masalan muzlatgich, kir yuvish mashinasi va shunga o‘xshash tovarlar), ammo umumiy og‘irlik 10 kilogrammdan oshmasligi kerak 1 kalendar oyda.
Yuqorida qayd etilgan har qanday tovarni belgilangan norma va/yoki davriylikdan ortiq olib o‘tilganda belgilangan tartibda bojxona to‘lovlari undiriladi.
“Jismoniy shaxslar tomonidan shaxsiy ehtiyojlari uchun tovarlarni olib o‘tish tartibini yanada takomillashtirish to‘g‘risida”gi prezident qaroriga muvofiq yagona bojxona to‘lovi bojxona to‘lovlari undirilmaydigan tovarlarni jismoniy shaxslar tomonidan respublikaga olib kirishning cheklangan meʼyorlaridan ortgan taqdirda, Tashqi iqtisodiy faoliyat tovar nomenklaturasi kodidan va kelib chiqish mamlakatidan qatʼiy nazar tovarlarning barcha toifalari bo‘yicha bojxona qiymatidan kelib chiqqan holda, cheklangan meʼyorlardan ortiq qismiga nisbatan undiriladi.
Yagona bojxona to‘lovi stavkasi tovarning bojxona qiymatidan 30 foiz, lekin har bir kilogrami uchun 3 dollardan kam bo‘lmagan miqdorni tashkil etadi.
Jismoniy shaxslar amaldagi tartiblarga muvofiq olib O‘zbekiston bojxona chegarasini kesib o‘tishda o‘zlari bilan olib ketayotgan tovar va moddiy boyliklarning prezident va Vazirlar Mahkamasi qarorlari bilan belgilangan meʼyorlar asosida ishonchli va to‘g‘ri deklaratsiyalanishi uchun qonun hujjatlarga muvofiq javobgar bo‘ladi.
“Toshkent viloyati bojxona boshqarmasi bojxona organlari faoliyatiga doir xolis va haqqoniy xabarlarni eʼlon qilishda ommaviy axborot vositalari, keng jamoatchilik vakillari bilan o‘zaro hamkorlikka doimo tayyorligini maʼlum qiladi”, — deyiladi xabarda.
Izoh (0)