Toshkent shahar bojxona boshqarmasi tomonidan 339 million so‘mlik tamaki mahsulotlarining noqonuniy aylanuviga chek qo‘yildi. Bu haqda boshqarma matbuot xizmati xabar berdi.
Qayd etilishicha, bojxona boshqarmasi Kontrabandaga qarshi kurashish bo‘limi xodimlari tomonidan huquqni muhofaza qiluvchi boshqa organlar bilan hamkorlikda poytaxtning Olmazor tumanida tezkor tadbir o‘tkazilgan. Tadbir davomida Lacetti rusumli avtotransport vositalarining xatti-harakati oldindan kuzatuvga olingan va mazkur transport vositalari tumandagi yashash xonadonlaridan biriga kelib to‘xtagan vaqtida ko‘zdan kechirilgan.
Aniqlanishicha, transport vositalarida mazkur xonadonda tashkil etilgan “yama”ga tamaki mahsulotlari joylashtirish uchun kelgan ekan. Shuningdek, xonadonda muqaddam “yama” sifatida saqlanib kelingan, keyinchalik sotish uchun mo‘ljallangan tamaki mahsulotlari borligi ham aniqlangan.
Natijada o‘tkazilgan tezkor tadbirda qiymati 339 million so‘mlik 17 890 quti tamaki mahsulotlarining ichki hududda noqonuniy aylanuviga chek qo‘yilgan. Hozirda holat yuzasidan tergovga qadar tekshiruv harakatlari olib borilmoqda.
Avvalroq Xorazmda 422 million so‘mlik aksiz markasiz tamaki mahsulotlari aniqlangani, Navoiy va Buxoroda 600 mln so‘mlik qalbaki aksiz markali alkogol mahsulotlari savdosining oldi olingani to‘g‘risida xabar berilgandi.
Izoh (0)