Farg‘onada bir tup tolni kesib tashlagan fuqaro tabiatga 3 mln so‘m zarar yetkazdi
Farg‘ona viloyati Buvayda tumanida bir tup tolni kesib tashlagan fuqaro tabiatga uch mln so‘m zarar yetkazdi. Bu haqda viloyat Ekologiya boshqarmasi axborot xizmati xabar berdi.
Foto: Farg‘ona viloyat Ekologiya boshqarmasi axborot xizmati
Unga ko‘ra, viloyat prokuraturasi va viloyat Ekologiya boshqarmasi Buvayda tuman bo‘limi hamkorligida olib borilayotgan reyd tadbirlari jarayonida, “Joy” MFY hududidagi avtomobil yo‘li chetida bir tup tol daraxti shu mahallada yashovchi fuqaro U.L. tomonidan o‘zboshimchalik bilan kesib tashlangani maʼlum bo‘ldi.
Holat yuzasidan davlat inspektorlari tomonidan Maʼmuriy javobgarlik to‘g‘risidagi kodeksning 79-moddasi 1-qismiga muvofiq maʼmuriy bayonnoma rasmiylashtirilib, 1 700 000 ming so‘m miqdorida jarima hamda 3 060 000 so‘m o‘simlik dunyosiga zarar hisoblandi.
Avvalroq Oliy Majlis Qonunchilik palatasi deputatlari va Ekologik partiya fraksiyasi aʼzolari Ekologiya vazirligining Toshkent viloyati boshqarmasi tomonidan daraxtlarni kesishga berilgan ruxsatnomalarning qonuniyligi yuzasidan bosh prokurorga deputatlik so‘rovi yuborgandi.
Farg‘onada bir hafta davomida ekologiyaga zarar yetkazgan 99 kishi jarimaga tortildi, Toshkent shahrida Ekopark xodimi qish kunlarida daraxtlar uyquda bo‘lishiga qaramasdan daraxtlar shoxlariga shakl bergani uchun 1 020 000 zarar belgilandi va 1 700 000 ming so‘m jarimaga tortildi. Shuningdek, Farg‘ona viloyatining Bag‘dod tumanida bir tup chinor daraxtini o‘zboshimchalik bilan kesgan fuqaroga tabiatga yetkazilgan zarar uchun 47 million 775 ming so‘m jarima yozilgandi.
Izoh (0)