Rossiyaning Belgorod viloyatida Il-76 samolyoti halokatida halok bo‘lgan navigator asli qozog‘istonlik bo‘lib chiqdi. Bu haqda “Nur.kz” xabar berdi.
Halokatga uchragan samolyotning navigatori Ust-Kamenogorskda tug‘ilgan Aleksey Visokin bo‘lib chiqdi. Bu haqda uning rafiqasi Olga RT telekanaliga bergan intervyusida gapirdi. Ayolning so‘zlariga ko‘ra, Aleksey Suriyadagi jangovar harakatlar faxriysi bo‘lgan va yanvar voqealari paytida Qozog‘istonga uchib kelgan.
“Men turmush o‘rtog‘im ortga qaytgan samolyotda (asirlarni olib ketayotgan ikkinchi samolyot) bo‘lgan deb umid qilgandim, lekin u halokatga uchraganini tushundim, chunki parvoz oldidan u doim parvoz qilayotganini va yetib kelganini xabar qilardi. Uzoq vaqt xabar kelmadi, bunga ishonishni xohlamasdim”, — deydi Olga.
Belgorodda Il-76 halokati
24-yanvar kuni Rossiyaning Belgorod viloyatida Il-76 samolyoti halokatga uchradi. Rossiya Mudofaa vazirligining da’vo qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi, ammo samolyot halokatida Rossiyani ayblamadi ham. “Ukrainskaya pravda” nashri Ukraina Qurolli kuchlaridagi manbalarga tayanib, ruslar Il-76 da Xarkovga tez-tez o‘q uzadigan S-300 havo mudofaa tizimi uchun raketalarni tashiganini ma’lum qildi.
Keyinchalik, Ukraina razvedkasi 24-yanvar kuni mahbuslar almashinuvi bo‘lishi kerakligini tasdiqladi, ammo bu jarayon to‘xtatildi. Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi. Rossiya aviahalokatda paytida halok bo‘lgan 65 nafar ukrainalik asirlar ro‘yxatini e’lon qildi. Biroq ukrainalik jurnalistlarga ko‘ra, ro‘yxatdagi kamida 17 kishi 3-yanvar kuni asirlar almashinuvi doirasida vataniga qaytgan.
O‘z navbatida, Rossiya asirlar qaysi yo‘nalishda, transportda va necha kishi bo‘lgani haqida Ukrainani ogohlantirmagan. Avvalgi asirlar almashinuvida ruslar ukrainlarni bu borada ogohlantirib kelgandi. Ukraina Xavfsizlik xizmati Il-76 samolyotining halokatga uchrashi bo‘yicha tergov boshlagan.
Izoh (0)