AQSH Belgorod viloyatida Rossiyaning Il-76 harbiy samolyoti halokatga uchrashi holatini tekshirmoqda, dedi Oq uy Milliy xavfsizlik kengashi vakili Jon Kirbi.
“Biz (samolyot halokati haqidagi) xabarlarni ko‘rdik, ma’lumot olishga harakat qilyapmiz, ammo taxminlarga asoslanib gapirishim nomaqbul bo‘ladi. Bu xabarlar qanchalik ishonchli ekanini bilmaymiz. Ukraina unday desa, Rossiya bunday demoqda, biz yetarlicha bilmaymiz”, — deydi Kirbi.
Rossiyaning Il-76 harbiy-transport samolyoti 24-yanvar kuni ertalab Belgorod viloyatida halokatga uchradi. Rossiya Mudofaa vazirligining ma’lum qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan. Vazirlik Ukraina harbiylarini samolyotni urib tushirganlikda aybladi.
Ukraina rasmiylari urib tushirilgan samolyot bortida ukrainalik harbiy asirlar borligi haqidagi iddaolarni na tasdiqladi, na inkor qildi. Ukraina harbiy razvedkasi Moskva va Kiyev mahbuslarni almashishga tayyorlanayotganini tasdiqladi. Agentlik Il-76 bortida kim bo‘lgani haqida “ishonchli va to‘liq ma’lumot”ga ega emasligini bildirdi.
Rossiya samolyotining qulashi fonida Ukraina Qurolli Kuchlari Bosh shtabi ukrainalik harbiylar Rossiya raketalarining uchirilish nuqtalarini kuzatishda davom etayotganini va “qurol yetkazib berish vositalarini yo‘q qilish choralarini ko‘rayotganini” ma’lum qildi.
Izoh (0)