Ukraina prezidenti Vladimir Zelenskiy Belgorodda qulab tushgan va bortida ukrain asirlari bo‘lgani aytilayotgan Il-76 samolyoti halokati bo‘yicha xalqaro tekshiruv o‘tkazishni talab qildi. Kreml matbuot kotibi Dmitriy Peskov tegishli taklifga javob berdi. Bu haqda “TASS” xabar berdi.
Peskovga ko‘ra, Rossiya hukumati Belgorod yaqinidagi Il-76 halokati bo‘yicha xalqaro tergov o‘tkazilishiga rozi bo‘ladi, biroq u Ukraina rasmiylarining jinoyati deb hisoblansagina.
“Agar u Kiyev rejimining jinoiy harakatlari bo‘yicha xalqaro tekshiruv o‘tkazilishini nazarda tutsa, albatta, zarur”, — deydi Peskov.
Samolyot nega urib tushirilgani va bu ataylab qilingan ishmi, degan savolga Peskov quyidagicha javob berdi:
“Sizda prezident Zelenskiy administratsiyasining telefon raqami bo‘lishi kerak. Qo‘ng‘iroq qiling va shu savolni bering”, — dedi.
Kreml rasmiysining ta’kidlashicha, “ukrainaliklar o‘z asirlarini o‘ldirganlar” va bu, uning fikricha, “dahshatli akt”.
“Bu jarayonning davom etish istiqbollariga (asirlar almashinuvi — tahr.) qanday ta’sir qilishini hech kim aytolmaydi”, — dedi u.
Peskov nima bo‘lgani hali to‘liq aniq emasligi, tergovchilar samolyot qoldiqlarini o‘rganishni boshlaganini qo‘shimcha qildi.
Belgorodda Il-76 halokati
24-yanvar kuni Rossiyaning Belgorod viloyatida Il-76 samolyoti halokatga uchradi. Rossiya Mudofaa vazirligining da’vo qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi, ammo samolyot halokatida Rossiyani ayblamadi ham. “Ukrainskaya pravda” nashri Ukraina Qurolli kuchlaridagi manbalarga tayanib, ruslar Il-76’da Xarkovga tez-tez o‘q uzadigan S-300 havo mudofaa tizimi uchun raketalarni tashiganini ma’lum qildi.
Keyinchalik, Ukraina razvedkasi 24-yanvar kuni mahbuslar almashinuvi bo‘lishi kerakligini tasdiqladi, ammo bu jarayon to‘xtatildi. Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi. Rossiya aviahalokatda paytida halok bo‘lgan 65 nafar ukrainalik asirlar ro‘yxatini e’lon qildi. Biroq, ukrainalik jurnalistlarga ko‘ra, ro‘yxatdagi kamida 17 kishi 3-yanvar kuni asirlar almashinuvi doirasida vataniga qaytgan.
O‘z navbatida, Rossiya asirlar qaysi yo‘nalishda, transportda va necha kishi bo‘lgani haqida Ukrainanini ogohlantirmagan. Avvalgi asirlar almashinuvida ruslar ukrainlarni bu borada ogohlantirib kelgandi. Ukraina Xavfsizlik xizmati Il-76 samolyotining halokatga uchrashi bo‘yicha tergov boshlagan.
Izoh (0)