24-yanvar kuni Rossiya va Ukraina o‘rtasida harbiy asirlar almashinuvi bo‘lib o‘tishi kerak edi, biroq Belgorod yaqinida Rossiyaning Il-76 samolyoti halokatga uchraganidan keyin u bekor qilindi. Ukraina razvedkasi bu borada ba’zi tafsilotlar bilan o‘rtoqlashdi.
Razvedka vakillarining taʼkidlashicha, Rossiya tomoni halokatga uchragan samolyotda Ukraina qurolli kuchlari askarlari bo‘lganini daʼvo qila boshlagan, shu sababli keyingi tadbirlar bekor qilingan.
“Bizda samolyot bortida kim va qancha miqdorda bo‘lgani haqida ishonchli va to‘liq ma’lumot yo‘q. O‘z navbatida, Ukraina asirlar almashishga tayyorgarlik ko‘rish bo‘yicha barcha kelishuvlarni bajargan. Rossiyalik asirga olingan harbiy xizmatchilar o‘z vaqtida kelishilgan nuqtaga va xavfsiz yetkazilgan”, — deydi razvedka.
Razvedkachilarning qo‘shimcha qilishicha, asirga olingan Ukraina Qurolli kuchlari askarlarining xavfsizligi uchun Rossiya tomoni javobgar bo‘lishi kerak edi. Bundan tashqari, Ukraina tomoniga Belgorod havo hududi xavfsizligini ta’minlash zarurati haqida ma’lumot berilmagan. Bunday yondashuv avvalgi almashinuvlar paytida qo‘llanilgan.
Shuningdek, ruslar ukrainaliklarni samolyotlar soni, marshrutlari va asirlarni oldindan kelishilgan joyga yetkazish shakli haqida xabardor qilmagan. Asirlar almashinuvi havo, temir yo‘l va avtomobil transportida amalga oshishi mumkin.
“Bu Rossiya qasddan mahbuslarning hayoti va xavfsizligiga tahdid yaratishga qaratilgan harakatlarni amalga oshirganini ko‘rsatishi mumkin. Samolyotining 30 kilometrlik jangovar zonaga qo‘nishi xavfsiz bo‘lishi mumkin emas va har qanday holatda ham tomonlar buni muhokama qilishi kerak, aks holda bu butun asirlar almashinuv jarayoniga xavf tug‘diradi. Shunga asoslanib, Rossiyaning Ukrainadagi vaziyatni beqarorlashtirish va davlatimiz uchun xalqaro qo‘llab-quvvatlashni zaiflashtirish maqsadida rejalashtirilgan va qasddan qilingan harakatlari haqida gapirishimiz mumkin.”, — deydi Ukraina razvedkasi.
Halokatga uchragan samolyotda ukrainalik harbiy asirlar bo‘lgani haqidagi ma’lumot rasman tasdiqlanmagan.
Izoh (0)