Россиянинг Белгород вилоятида Ил-76 самолёти ҳалокатида ҳалок бўлган навигатор асли қозоғистонлик бўлиб чиқди. Бу ҳақда “Нур.кз” хабар берди.
Ҳалокатга учраган самолётнинг навигатори Уст-Каменогорскда туғилган Алексей Високин бўлиб чиқди. Бу ҳақда унинг рафиқаси Олга РТ телеканалига берган интервьюсида гапирди. Аёлнинг сўзларига кўра, Алексей Суриядаги жанговар ҳаракатлар фахрийси бўлган ва январь воқеалари пайтида Қозоғистонга учиб келган.
“Мен турмуш ўртоғим ортга қайтган самолётда (асирларни олиб кетаётган иккинчи самолёт) бўлган деб умид қилгандим, лекин у ҳалокатга учраганини тушундим, чунки парвоз олдидан у доим парвоз қилаётганини ва етиб келганини хабар қиларди. Узоқ вақт хабар келмади, бунга ишонишни хоҳламасдим”, — дейди Олга.
Белгородда Ил-76 ҳалокати
24 январь куни Россиянинг Белгород вилоятида Ил-76 самолёти ҳалокатга учради. Россия Мудофаа вазирлигининг даъво қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атади ва бунда Украина ҳарбийларини айблади. Украина ҳукумати ҳалокат учун жавобгарликни ўз зиммасига олмади, аммо самолёт ҳалокатида Россияни айбламади ҳам. “Украинская правда” нашри Украина Қуролли кучларидаги манбаларга таяниб, руслар Ил-76 да Харьковга тез-тез ўқ узадиган С-300 ҳаво мудофаа тизими учун ракеталарни ташиганини маълум қилди.
Кейинчалик, Украина разведкаси 24 январь куни маҳбуслар алмашинуви бўлиши кераклигини тасдиқлади, аммо бу жараён тўхтатилди. Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилди. Россия авиаҳалокатда пайтида ҳалок бўлган 65 нафар украиналик асирлар рўйхатини эълон қилди. Бироқ украиналик журналистларга кўра, рўйхатдаги камида 17 киши 3 январь куни асирлар алмашинуви доирасида ватанига қайтган.
Ўз навбатида, Россия асирлар қайси йўналишда, транспортда ва неча киши бўлгани ҳақида Украинани огоҳлантирмаган. Аввалги асирлар алмашинувида руслар украинларни бу борада огоҳлантириб келганди. Украина Хавфсизлик хизмати Ил-76 самолётининг ҳалокатга учраши бўйича тергов бошлаган.
Изоҳ (0)