Rossiyaning Belgorod viloyati Yablonovo qishlog‘i yaqinida Il-76 harbiy-transport samolyoti halokatga uchradi. Bu haqda “112” Telegram kanali xabar berdi. Telekanal ta’kidlashicha, bortda 63 kishi bo‘lib, ularning barchasi halok bo‘lgan. Ushbu ma’lumot rasman tasdiqlagani yo‘q. 63 kishining o‘limi haqida Rossiyaning “harbiy muxbiri” Yuriy Kotenok ham xabar berdi. U ushbu ma’lumotlarni qayerdan olganini ochiqlamadi.
Belgorod viloyati gubernatori Vyacheslav Gladkov Korochanskiy tumanida “baxtsiz hodisa” sodir bo‘lganini aytdi. Ammo aynan nima bo‘lganiga aniqlik kiritmadi.
“Hozirda voqea joyida tergov guruhi va Favqulodda vaziyatlar vazirligi xodimlari ishlamoqda. Ish jadvalimni o‘zgartirib, hududga bordim. Barcha tafsilotlar keyinroq”, — deyiladi xabarda.
Ko‘p o‘tmay Rossiya Mudofaa vazirligi Il-76 halokatini tasdiqladi. Vazirlik maʼlumotlariga ko‘ra, bortda Ukraina Qurolli kuchlarining asirlikdagi 65 nafar harbiy xizmatchisi bo‘lgan, ular almashish uchun Belgorod viloyatiga olib ketilayotgan edi, shuningdek, bortda ekipajning olti nafar aʼzosi va ularning uch hamrohi bo‘lgan. Harbiy vazirlikning ma’lum qilishicha, samolyot rejali parvoz vaqtida halokatga uchragan. Aerokosmik kuchlar komissiyasi “falokat sabablarini aniqlash uchun” halokat joyiga uchib ketgan.
Telegram kanallari Belgorod yaqinida samolyot halokatga uchragani aks etgan videoni chop etdi.
“Ukrainskaya pravda” nashrining Ukraina Qurolli kuchlaridagi manbasi xabar berishicha, samolyot halokati Ukraina harbiylarining “ishi” bo‘lgan. Nashrning Bosh shtabdagi suhbatdoshlariga ko‘ra, samolyot S-300 raketalarini olib ketayotgan edi. Biroz o‘tgach, “Ukrayinskaya pravda” o‘z yangiliklarini tahrirladi. Endilikda faqat Ukraina Qurolli kuchlaridagi manba samolyot halokatga uchraganini tasdiqlagani aytiladi. Nashrning Bosh shtabdagi suhbatdoshlari samolyot S-300 havo hujumidan mudofaa tizimi uchun raketalarni olib ketayotganini da’vo qilmoqda. Il-76 ning qulashi “Ukraina Qurolli kuchlarining ishi” bo‘lgani haqidagi gaplar olib tashlangan.
“112” Telegram-kanalida Il-76 halokatga uchragan joydan olingan suratlar e’lon qilindi. Samolyot Yablonovo qishlog‘idan besh-olti kilometr uzoqlikda qulagan, yerda hech qanday vayronagarchilik yo‘q. Bu haqda “TASS”ga Yablonovo qishlog‘idagi Salonikalik Demetriy cherkovi rektori ma’lum qildi.
“Qishloqda hech narsa zarar ko‘rmadi, u qishloq tashqarisida, dalada, taxminan besh-olti kilometr uzoqlikda quladi”, — dedi ruhoniy.
SHOT va Mash kanallarining yozishicha, Rossiya va Ukraina o‘rtasida 192 ga192 formatida mahbuslar almashinuvi 24-yanvar, chorshanba kuni bo‘lib o‘tishi kerak edi. Davlat Dumasi Mudofaa qo‘mitasi rahbari Andrey Kartapolovning daʼvo qilishicha, Belgorod viloyatida halokatga uchragan samolyotdan keyin ukrainalik mahbuslar o‘tirgan yana bir Il-76 ortga qaytgan. Uning so‘zlariga ko‘ra, ikkinchi samolyot 80 ga yaqin mahbusni olib uchayotgan edi.
Kreml samolyot halokatiga izoh bermadi. “Bu juda yangi ma’lumot. Biz shu bilan shug‘ullanyapmiz. Hozircha men hech narsa deyolmayman”, — dedi Rossiya prezidenti matbuot kotibi Dmitriy Peskov jurnalistlarga.
Izoh (0)