Bortida ukrainalik harbiy asirlar bo‘lgani aytilayotgan Il-76 rus harbiy samolyoti halokatga uchragani haqidagi ilk xabarlardan 12 soat o‘tib, Ukraina prezidenti Vladimir Zelenskiy falokatga munosabat bildirdi.
Zelenskiyning so‘zlariga ko‘ra, u Ukraina Mudofaa vazirligi, Ukraina Qurolli kuchlari, Ukraina xavfsizlik xizmati va harbiy razvedka vakillariga qo‘ng‘iroq qilib, ularning samolyot va ayirboshlash bilan bog‘liq vaziyat bo‘yicha hisobotlarini tinglagan.
“Ko‘rinib turibdiki, ruslar ukrainalik mahbuslarning hayoti, ularning yaqinlarining his-tuyg‘ulari va jamiyatimiz hissiyotlari bilan o‘ynamoqda.
Barcha faktlar aniqlanishi kerak. Samolyot Rossiya hududida — bizning nazoratimizdan tashqarida qulaganini hisobga olsak, iloji boricha ko‘proq.
“Faktlar” — hozir asosiy so‘z. Harbiy havo kuchlaridan foydalanish bo‘yicha Bosh qo‘mondon va Bosh shtabni tingladim. Bosh razvedka boshqarmasi barcha mahbuslar taqdirini tekshirmoqda. Xavfsizlik xizmati barcha holatlarni o‘rganmoqda. Va men Ukraina tashqi ishlar vaziriga hamkorlarni Ukrainadagi mavjud ma’lumotlar haqida xabardor qilishni topshirdim. Davlatimiz xalqaro tergov o‘tkazilishini talab qiladi”, — dedi Ukraina rahbari.
Shu bilan birga Zelenskiy Rossiyaning Il-76 samolyotini kim urib tushirgan bo‘lishi mumkinligi va uning qulashi sababi haqida hech qanday fikr bildirmadi.
Rossiya Il-76 halokatida Ukrainani ayblamoqda
Rossiyaning Il-76 harbiy-transport samolyoti 24-yanvar kuni ertalab Belgorod viloyatida halokatga uchradi. Rossiya Mudofaa vazirligining ma’lum qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi, ammo samolyot halokatida Rossiyani ayblamadi ham. Ukraina harbiy razvedkasi 24-yanvar kuni Moskva va Kiyev asirlarni almashishga tayyorlanayotganini tasdiqladi va Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi.
“RBK-Ukraina” manbalariga ko‘ra, falokat holatlari aniqlanmaguncha Zelenskiy mamlakatning markaziy hududlariga safarini bekor qilgan va uni tug‘ilgan kuni bilan tabriklash uchun uchrashuvlar uyushtirishni taqiqlagan. 25-yanvar kuni Zelenskiy 46 yoshga to‘ladi.
Izoh (0)