Rossiya tashqi ishlar vaziri Sergey Lavrov CBS News telekanaliga bergan intervyusida AQSH yillar davomida Rossiya prezidenti Vladimir Putinning “xayrixohlik namoyishlarini” e’tiborsiz qoldirib kelganini aytdi.
Vazirning taʼkidlashicha, Moskva va Vashington o‘rtasidagi munosabatlar uzoq vaqt davomida do‘stona bo‘lib kelgan, biroq AQSHning 43-prezidenti Jorj Bush davrida o‘zaro ishonch yo‘qola boshlagan.
Putin prezidentligining dastlabki ikki muddatida ko‘rsatgan ulkan xayrixohlik e’tiborga olinmadi. U (kichik Bush) oddiygina qilib: “Yaxshi, bu yigit juda yaxshi, uni cho‘ntagimizda saqlaymiz” degan, — iddao qildi Lavrov.
Uning so‘zlariga ko‘ra, AQSH siyosatchilari Vashington SSSR parchalanganidan keyin olib borgan “nomaqbul siyosat”dan zarracha ham saboq olmagan. Lavrov G‘arb davlatlarining Sovet Ittifoqi Kommunistik partiyasi markaziy qo‘mitasi sobiq bosh kotibi va SSSR birinchi prezidenti Mixail Gorbachyovga berilgan NATOni kengaytirmaslik haqidagi va’dasini eslatib o‘tdi hamda Moskva kengayishning ehtimoliy oqibatlari haqida bir necha bor ogohlantirganini ta’kidladi.
Biz chindan ham adolatdan, shu jumladan, Rossiya va Ukraina munosabatlaridagi adolatdan manfaatdor bo‘lgan har bir kishini tinglashga tayyormiz. Bu, albatta, Ukrainadan Rossiyaga qarshi urush quroli sifatida foydalanishga qaratilgan G‘arb siyosatiga chek qo‘yishni o‘z ichiga oladi, — deb ta’kidladi vazir.
2017-yilda amerikalik rejissor Oliver Stounga bergan intervyusida Putin AQSHning sobiq prezidenti Bill Klinton (2001-yilgacha davlat rahbari bo‘lgan) bilan so‘nggi uchrashuvlaridan birida Rossiyaning NATOga kirish variantini ko‘rib chiqishni taklif qilganini aytgandi. Rossiya rahbarining so‘zlariga ko‘ra, Klinton bunga qarshi emasdi, ammo butun Amerika delegatsiyasi “asabiylashgan”. Stounning Rossiya tomoni alyansga kirish uchun ariza berganmi, degan savoliga javoban Putin kulib yubordi.
2022-yil may oyida AQSH davlat kotibi Entoni Blinken Rossiyaning o‘zi 90-yillarda NATOga kirish g‘oyasidan voz kechganini aytdi.
Izoh (0)