Xitoy janubi-g‘arbidagi Yunnan provinsiyasida 47 kishi ko‘chki ostida qolib ketdi. Sel va toshlar orasidan sakkiz kishining jasadi topildi, qolganlarning taqdiri hozircha noma’lum. Bu haqda BBC xabar berdi.
Xitoy rahbari Si Szinpin barcha zarur resurslarni jalb qilgan holda keng ko‘lamli qutqaruv operatsiyasini o‘tkazishni buyurdi. Bosh vazir o‘rinbosari Chjan Gotsin qidiruvga shaxsan rahbarlik qilish uchun ishchi guruh bilan fojia joyiga bordi.
Ko‘chki mahalliy vaqt bilan 22-yanvar soat 06:00 da tog‘li Chjaotun hududida sodir bo‘lgan. Qish vaqtida u yerda havo harorat noldan pastga tushadi va odamlar muzlagan tosh qatlami ostida qolgan.
“Juda kuchli shovqin bo‘ldi va yer zilzila bo‘lgandek silkindi”, — dedi jabrlangan qishloq aholisidan biri jurnalistlarga. Yana bir mahalliy aholining so‘zlariga ko‘ra, ko‘chki paytida uylarda asosan bolalar va qariyalar bo‘lgan.
Ijtimoiy tarmoqlarda e’lon qilingan voqea guvohlari tasvirlarida qorli tog‘ cho‘qqilari fonida qutqaruvchilar vayronalar ustida ishlayotgani aks etgan. Yunnan provinsiyasida ko‘chki va suv toshqinlari tez-tez sodir bo‘ladi. 2013-yil yanvarida o‘sha hududdagi boshqa qishloqda ko‘chki oqibatida kamida 18 kishi halok bo‘lgan edi.
Izoh (0)