Xitoyda suv toshqini paytida 75 ta timsoh fermadan qochib ketdi

Xitoyda “Haykuy” to‘fonidan keyin yuz bergan suv toshqinlari chog‘ida mamlakat janubidagi chorvachilik fermasidan o‘nlab timsohlar qochib ketdi. Guandun provinsiyasida joylashgan fermadagi ko‘l suvi qirg‘oqdan toshib ketgan payt 75 bosh timsoh ozodlikka chiqqan.

Jonivorlarning ba’zilari tiriklayin qo‘lga olingan, boshqalari esa “xavfsizlik nuqtai nazaridan” mahalliy hokimiyat tomonidan otib o‘ldirilgan yoki elektr toki bilan urilgan.

Davlat matbuoti xabarlariga ko‘ra, hozirgacha qochoq jonivorlar hukumat pistirmasidan muvaffaqiyatli o‘tib ketmoqda: bor-yo‘g‘i sakkizta sudralib yuruvchi qo‘lga olingan. Har ehtimolga qarshi yaqin atrofdagi qishloqlar aholisidan uyda qolish so‘raldi.

“Haykuy” to‘foni bir haftadan beri Osiyoning janubiy hududlarini qamrab olmoqda, u allaqachon Gonkong, Tayvan, Yaponiya va Xitoyning ba’zi hududlariga yetib borgan.

To‘fon tropik bo‘ron darajasiga tushdi. Biroq “Haykuy” shu vaqtgacha yetti kishining o‘limiga sabab bo‘ldi, yana uch kishi bedarak yo‘qolgan. To‘fon Xitoy janubida ham ko‘chki va suv toshqinlariga sabab bo‘ldi.

Davlat matbuotlari timsohlar qochib ketishi oqibatida hech kim jabrlanmagani haqida xabar berdi. Biroq rasmiylar yirtqichlarning ba’zilari gavjum suv havzalarida yashiringan bo‘lishi mumkinligini tan oldi. Qutqaruvchilar ularni qidirish uchun gidrolokatsion aniqlash apparatlaridan foydalanmoqda.

“Hozirda vaziyat nazorat ostida, ammo qochib ketgan timsohlar soni juda ko‘p”, — dedi hudud Favqulodda vaziyatlarni boshqarish byurosi rasmiysi.

Byuro maʼlumotlariga ko‘ra, fermadan 69 ta katta timsoh va oltita yosh timsohchalar qochib ketgan. The Washington Post gazetasining yozishicha, qochoqlar — siam timsohlari. Buyuk Britaniyadagi Crocodiles of the World hayvonot bog‘i ma’lumotlariga ko‘ra, ularning uzunligi uch metrga yetishi mumkin.

Jonivorlarni qo‘lga olishda ishtirok etgan o‘t o‘chiruvchilardan biri OAVga ushlangan katta timsohlarning o‘rtacha og‘irligi 75 kilogrammga yaqin, uzunligi esa 2 metrdan ortiq ekanini aytdi. Uning so‘zlariga ko‘ra, qo‘lga olingan jonivorlarning aksariyati otib tashlangan.

Guandon provinsiyasining Maomin shahrida bir nechta timsoh fermalari mavjud. Ular terisi va go‘shti uchun boqiladi.