18-yanvar kuni O‘zbekiston Tasviriy sanʼat galereyasida Turkistondagi jadidchilik harakatiga bag‘ishlangan “Xotira yo‘lagi” ko‘rgazmasining ochilish marosimi bo‘lib o‘tdi. Bu haqda “Daryo” muxbiri xabar bermoqda.
Tadbirda tarixchilar, madaniyat va sanʼat, ommaviy axborot vositalari vakillari ishtirok etdi.
Ko‘rgazma Milliy mass-mediani qo‘llab–quvvatlash va rivojlantirish jamoat fondi, Qatag‘on qurbonlari xotirasi davlat muzeyi, Fanlar akademiyasining Tarix instituti va O‘zbekiston Tasviriy sanʼat galereyasi hamkorligida tashkil etilgan.
“Xotira yo‘lagi” XIX asr oxiri XX asr boshlaridagi Turkiston tarixiga oid tasvirlarni, ayniqsa, jadidlarning rasmiy hujjatlari, fotosuratlari va shaxsiy buyumlarini o‘z ichiga olgan.
Milliy mass-mediani qo‘llab-quvvatlash va rivojlantirish jamoat fondi direktori Akromjon Fozilovning aytishicha, eksponatlar ichida originallari ham mavjud.
Ko‘rgazma 2023-yil 11—12-dekabr kunlari Toshkent shahrida bo‘lib o‘tgan “Jadidlar: milliy o‘zlik, istiqlol va davlatchilik g‘oyalari” mavzusidagi xalqaro ilmiy konferensiya doirasida tashkil etilgan bo‘lib, endilikda keng jamoatchilikka o‘z eshiklarini ochmoqda. Ko‘rgazmada 20 dan ortiq asl nusxadagi eksponatlar bor. Shu bilan birga, turli suratlar ishlangan, daraxt yoki boshqa ko‘rinishdagi maxsus materiallardan ham foydalanilgan. Bunda eʼtibor faqatgina eksponatlarga emas, balki o‘sha davr ruhini aks ettirishga, jadidlar g‘oyalarini maksimal yetkazishga qaratilgan, — dedi fond rahbari.
Ochilish marosimida O‘zFA Tarix instituti direktori, akademik Azamat Ziyo ko‘rgazma O‘zbekiston tarixining jadidchilik bilan bog‘liq sahifalarini o‘rganishga xizmat qilishini aytdi.
“Xotira yo‘lagi”dan har birimiz o‘tishimiz kerak. Bunda qorong‘ilikdan yorug‘likka chiqish g‘oyasi turibdi. Chindan ham, millatimiz bugungi Yangi O‘zbekistonga yetib kelguncha og‘ir davrlarni boshdan o‘tkazgan. Jadid bobolarimiz to‘g‘risida shoirlar sheʼrlar bitishi, yozuvchilar roman va hikoyalar yozishi, kinochilar, teatrchilar ham asarlar yaratishi kerak. Rassomlar ularning suratlarini mo‘yqalamga olishi lozim. Yoshlar bundan bahramand bo‘lib, jadidlarimizga munosib avlod bo‘lishi zarur, deb o‘ylayman. Bu yo‘lak milliy yo‘lagimiz, — dedi senator.
Ko‘rgazma Tasviriy sanʼat galereyasida 18-fevralgacha davom etadi.
Izoh (0)