“Бунда қоронғиликдан ёруғликка чиқиш ғояси турибди” — Тошкентда “Хотира йўлаги” кўргазмаси очилди (фото)

18 январь куни Ўзбекистон Тасвирий санъат галереясида Туркистондаги жадидчилик ҳаракатига бағишланган “Хотира йўлаги” кўргазмасининг очилиш маросими бўлиб ўтди. Бу ҳақда “Дарё” мухбири хабар бермоқда.

Тадбирда тарихчилар, маданият ва санъат, оммавий ахборот воситалари вакиллари иштирок этди.

Кўргазма Миллий масс-медиани қўллаб–қувватлаш ва ривожлантириш жамоат фонди, Қатағон қурбонлари хотираси давлат музейи, Фанлар академиясининг Тарих институти ва Ўзбекистон Тасвирий санъат галереяси ҳамкорлигида ташкил этилган.

“Хотира йўлаги” ХIX аср охири ХХ аср бошларидаги Туркистон тарихига оид тасвирларни, айниқса, жадидларнинг расмий ҳужжатлари, фотосуратлари ва шахсий буюмларини ўз ичига олган.

Миллий масс-медиани қўллаб-қувватлаш ва ривожлантириш жамоат фонди директори Акромжон Фозиловнинг айтишича, экспонатлар ичида оригиналлари ҳам мавжуд.

Кўргазма 2023 йил 11—12 декабрь кунлари Тошкент шаҳрида бўлиб ўтган “Жадидлар: миллий ўзлик, истиқлол ва давлатчилик ғоялари” мавзусидаги халқаро илмий конференция доирасида ташкил этилган бўлиб, эндиликда кенг жамоатчиликка ўз эшикларини очмоқда. Кўргазмада 20 дан ортиқ асл нусхадаги экспонатлар бор. Шу билан бирга, турли суратлар ишланган, дарахт ёки бошқа кўринишдаги махсус материаллардан ҳам фойдаланилган. Бунда эътибор фақатгина экспонатларга эмас, балки ўша давр руҳини акс эттиришга, жадидлар ғояларини максимал етказишга қаратилган, — деди фонд раҳбари.

Очилиш маросимида ЎзФА Тарих институти директори, академик Азамат Зиё кўргазма Ўзбекистон тарихининг жадидчилик билан боғлиқ саҳифаларини ўрганишга хизмат қилишини айтди.

“Хотира йўлаги”дан ҳар биримиз ўтишимиз керак. Бунда қоронғиликдан ёруғликка чиқиш ғояси турибди. Чиндан ҳам, миллатимиз бугунги Янги Ўзбекистонга етиб келгунча оғир даврларни бошдан ўтказган. Жадид боболаримиз тўғрисида шоирлар шеърлар битиши, ёзувчилар роман ва ҳикоялар ёзиши, киночилар, театрчилар ҳам асарлар яратиши керак. Рассомлар уларнинг суратларини мўйқаламга олиши лозим. Ёшлар бундан баҳраманд бўлиб, жадидларимизга муносиб авлод бўлиши зарур, деб ўйлайман. Бу йўлак миллий йўлагимиз, — деди сенатор.

Кўргазма Тасвирий санъат галереясида 18 февралгача давом этади.