Xorazm viloyati Shovot tumanida daraxtlar kesib, yoqib yuborilishi oqibatida 756 mln so‘m zarar yetkazildi. Bu haqda viloyat Ekologiya boshqarmasi axborot xizmati xabar berdi.
Tumanning “Guliston” mahallasida joylashgan “A.L” fermer xo‘jaligi hududida jami 119 tup har xil turdagi va o‘chamdagi manzarali daraxtlar kesib olingani hamda 19 tup har xil turdagi manzarali daraxtlarni o‘sishdan to‘xtamaydigan va to‘xtash darajasida shikast yetkazilgani hamda yoqib yuborilgani aniqlandi.
Bu bilan “Tabiatni muhofaza qilish to‘g‘risida”gi qonunning 21-moddasi, “O‘simlik dunyosini muhofaza qilish va undan foydalanish to‘g‘risida”gi qonunnig 37-moddasi va “Atmosfera havosini muhofaza qilish to‘g‘risida”gi qonunning 20-moddasi talablari buzilgan.
Vazirlar Mahkamasining 2022-yildagi “Davlat o‘rmon fondiga kirmaydigan daraxtlar va butalarni ekish, parvarish qilish va ulardan foydalanish tartibini yanada takomillashtirish to‘g‘risida”gi qarori bilan tasdiqlangan “Davlat o‘rmon fondiga kirmaydigan daraxtlar va butalarni ekish, parvarish qilish hamda ulardan foydalanish tartibi to‘g‘risida”gi nizomning 4-ilovasiga asosan tabiatga yetkazilgan zarar 456 million 20 ming so‘mni, yetkazilgan zararning undirish summasi 756 million 200 ming so‘mni tashkil qildi.
Holat yuzasidan Jinoyat kodeksining 198-moddasi 3-qismi bilan ekinzorlarni, o‘rmonlarni, daraxtlarni yoki boshqa o‘simliklarni qastdan shikaslantirish, payxon qilish, nobud qilish va ko‘p miqdorda zarar yetkazishga sabab bo‘lgani holati yuzasidan jinoyat ishi qo‘zg‘atildi.
Izoh (0)