Rim shahridagi Kvirinal saroyida 8-iyun kuni Shavkat Mirziyoyev va Italiya prezidenti Serjo Mattarellaning muzokaralari bo‘lib o‘tdi. Bu haqda "Daryo" muxbiri xabar berdi.
Unga ko'ra, davlat rahbari tashrif bilan kelish taklifi va mehmondo‘stlik uchun minnatdorlik bildirib, Serjo Mattarella va Italiya xalqini kuni kecha o‘tgan milliy bayram – Respublika eʼlon qilingan kun bilan qutladi.
Italiya prezidenti Yangi O‘zbekistonda amalga oshirilayotgan islohotlarni qo‘llab-quvvatlashini bildirdi hamda mamlakatning Markaziy Osiyoda barqarorlik va farovonlikni taʼminlash borasidagi saʼy-harakatlarini yuqori baholadi. Davlat rahbarlari iqtisodiy hamkorlik masalalarini ko‘rib chiqdi.
Qayd etilishicha, keyingi yillarda o‘zaro tovar ayirboshlash va qo‘shma korxonalar soni ikki barobar ko‘paydi. Mamlakatda Pietro Fiorentini, Terra-nova, Danieli, Imagro, Ansaldo, Saipem kabi yetakchi kompaniyalari muvaffaqiyatli faoliyat yuritmoqda.
Prezidentlar kuni kecha o‘tgan biznes-forum natijalarini mamnuniyat bilan qayd etdi. Uning yakunida umumiy qiymati 9 milliard yevrodan ziyod bo‘lgan kelishuv va shartnomalarning salmoqli to‘plami imzolandi. Gumanitar aloqalarni rivojlantirishga alohida eʼtibor qaratildi. O‘zbekiston va Italiyaning madaniy-tarixiy merosiga bag‘ishlangan ko‘rgazma tashkil etishga kelishib olindi.
Bundan tashqari, taʼlim, arxeologiya, ekologik xatarlarga qarshi kurashish sohalarida hamkorlik qilish istiqbollari muhokama qilindi. Toshkentda Turin va Piza universitetlarining filiallari muvaffaqiyatli ishlamoqda. Ketma-ket uch yil O‘zbekiston Venetsiyadagi Xalqaro biyennaleda ishtirok etib kelmoqda.
Yetakchilar mintaqaviy va xalqaro ahamiyatga molik masalalar, eng avvalo, Afg‘onistondagi vaziyat yuzasidan ham fikr almashdi. Afg‘on xalqiga manzilli gumanitar yordamni davom ettirish hamda maxsus vakillarning maslahatlashuvlarini muntazam o‘tkazish muhimligi taʼkidlandi.
Uchrashuv yakunida Shavkat Mirziyoyev Serjo Mattarellani mamlakatga rasmiy tashrif bilan kelishga taklif etdi.