Gidrometeorologiya xizmati markazining bosh direktori Sherzod Habibullayev 2023-yilning may oyida o‘zini o‘zi 46 million so‘m bilan rag‘batlantirgan edi.
Buyruqda “O‘zgidromet”da ijro intizomi bo‘yicha mas’ul bo‘lgan xodimlarni rag‘batlantirish ko‘zda tutilgan. Aniqrog‘i, 2022-yilda kelib tushgan murojaatlar, hujjatlar, topshiriqlar, buyruq va farmoyishlar ijrosini o‘z vaqtida sifatli bajarishda faol ishtirok etgan xodimlar rag‘batlantirilgan.
Yuqorida zikr etilgan vazifalarni bajarishda faol ishtirokchi sifatida bosh direktor Sherzod Habibullayev o‘zini va o‘rinbosari Ibratjon Karimovni qayd etgan. U o‘zi va o‘rinbosarini mehnatga haq to‘lashning eng kam miqdorining (920 ming so‘m) 50 barobarida, ya’ni 46 million so‘m bilan rag‘batlantirgan.
Markazning murojaatlar bilan ishlash va ijro intizomi bo‘limi boshlig‘i Dilmurod Qoriyevga esa mehnatga haq to‘lashning eng kam miqdori (MHTEKM) 5 barobari — 4 million 6 ming so‘m rag‘batlantirish yozilgan. Ushbu bo‘limning 1 toifali mutaxassisi K.Bahromovga esa MHTEKM 2 barobari — 1 million 840 ming so‘m berilgan.
Yana bir qiziq jihati, mazkur buyruqqa bosh direktor o‘rinbosari Firuz Safarovning bildirishnomasi asos qilib olingan. Ko‘rinadiki, Firuz Safarov bosh direktorni rag‘batlantirishni so‘rab bosh direktorga bildirishnoma kiritgan va u Sherzod Habibullayev tomonidan ma’qullangan.
Prezident tanqidi
Prezident Shavkat Mirziyoyev raisligida 16-yanvar kuni o‘tkazilgan videoselektor yig‘ilishida budjetdan 2023-yilda qancha noqonuniy xarajat, kamomad va o‘g‘riliklarga yo‘l qo‘yilgani ma’lum qilindi. Xususan, “O‘zgidromet” rahbariyati budjetdan tashqari mablag‘lar hisobidan asossiz 1,3 milliard so‘m ssuda olgan, shuningdek, o‘ziga bir necha barobar ko‘proq miqdorda mukofotlar yozib kelgani tanqid qilindi.
Sakkiz oydan buyon izoh yo‘q
Tabiat resurslari vazirligi holat yuzasidan xizmat tekshiruvi tayinlagan va tegishli tartibda o‘rganish ishlari olib borilayotganini ma’lum qilgan edi.
“Daryo” nashrining vazirlik axborot xizmatiga mazkur masala yuzasidan izoh so‘rab bir necha marotaba yo‘llagan murojaatiga voqeadan 8 oy o‘tgan bo‘lsa-da, hech qanday javob berilganicha yo‘q. O‘ylaymizki, AOKA va tegishli idoralar vazifasiga sovuqqonlik bilan qaragan xodimlarga nisbatan tegishli tartibda chora ko‘radi.
Izoh (0)