“Daryo” nashrida 10-sentabr kuni “Qarshi shahri hokimi Normo‘min Xolboyev o‘zini rag‘batlantirish uchun 75 million so‘m mablag‘ ajratish haqida qaror chiqardi”, nomli material e’lon qilingan edi.
Unda avgust oyida shahar hokimi Normo‘min Xolboyev tomonidan imzolangan qarorda 1-sektor yaʼni hokim sektori viloyatdagi “Eng tashabbuskor sektor” deya e’tirof etilgan. Shunga muvofiq, zaxira mablag‘laridan hokimga 75 million so‘m ajratish qayd etilgan. Hokimlik mazkur holatni Vazirlar Mahkamasining qaroriga muvofiq deya bayonot bergan edi.
Holat yuzasidan Korrupsiyaga qarshi kurashish agentligi axborot xizmati “Daryo”ga izoh berdi.
Aytilishicha, Qarshi shahar hokimining qarori amaldagi qonunchilik hujjatlari talablariga zid tarzda qabul qilingani aniqlanib, agentlik tomonidan Korrupsiyani keltirib chiqaruvchi sabab va shart-sharoitlarni bartaraf etish choralarini ko‘rish to‘g‘risida taqdimnoma kiritilgan.
“Taqdimnomaga asosan, Qashqadaryo viloyat hokimining 2023-yil 19-sentabr kuni 414-4-0-Q/23-son qarori bilan Qarshi shahar hokimining ushbu qarori bekor qilindi.
Shuningdek, mazkur holatda qonun buzilishiga yo‘l qo‘ygan shaxslarga tegishli qonuniy chora ko‘rish uchun Agentlik tomonidan to‘plangan hujjatlar Bosh prokuratura hamda Iqtisodiyot va moliya vazirligiga yuborildi”, — deyiladi agentlik axborotida.
Qo‘shimcha qilinishicha, agentlik fuqarolik jamiyati vakillarining jamoatchilik nazorati va faol fuqarolik pozitsiyasini qo‘llab-quvvatlaydi hamda davlat organlari va tashkilotlaridagi har qanday ko‘rinishdagi korrupsiyaviy xavf-xatarlarga murosasiz munosabatda bo‘lishga chorlaydi.
Mavzuga doir:
- “Qonunlarni, odamlarni mensimaydigan, korrupsiya balosiga berilgan har qanday rahbar bilan xayrlashamiz” — Shavkat Mirziyoyev
- Termiz shahrining sobiq hokimi va uning sheriklariga sud hukmi o‘qildi
- Antikorrupsiya agentligi Yakkasaroy hokimini “tadbirkorlik bilan shug‘ullanyapti”, dedi. Hokimlik buni rad etmoqda
Izoh (0)